Heimildin birti í morgun frétt þar sem sagt er frá því að Gísli Jökull Gíslason, rannsóknarlögreglumaður hjá lögreglunni á höfuðborgarsvæðinu, hafi sent listamanninum Oddi Eysteini Friðrikssyni, sem gengur undir listamannsnafninu Odee, tölvupósta. Í tölvupóstunum sagðist Gísli vera sjálfstætt starfandi blaðamaður. Sendi Gísli Oddi póstana til að leita upplýsinga um gjörning sem snerist um að listamaðurinn setti upp vefsíðu í nafni Samherja þar sem beðist var afsökunar á framferði fyrirtækisins í Afríku auk þess að senda út sams konar fréttatilkynningu í nafni þess.

Sjá einnig: Listamaðurinn ODEE stígur fram og lýsir yfir ábyrgð á fölsku afsökunarbeiðni Samherja

Aðspurður sagðist Oddur að honum hefði ekki fundist þetta óþægilegt heldur fremur áhugavert.

Heimildin náði sambandi við Gísla og spurði hvers vegna hann hefði villt á sér heimildir með slíkum hætti. Gísli sagðist eingöngu hafa verið að kanna hver stæði á bak við síðuna. Aðspurður sagðist hann ekki hafa verið með málið til rannsóknar en um „eitthvað svona“ berist tilkynningar og slík tilkynning hafi borist um síðuna.

Gísli sagðist með því að hafa sagst, í tölvupóstunum,  starfa sem blaðamaður ekki hafa verið að gera tilraun til að „fela þetta neitt sérstaklega“. Hann bætti því við að hann skrifaði greinar í blöðin.

Þess má einnig geta að Gísli hefur sent frá sér tvær bækur um viðfangsefni tengd síðari heimsstyrjöldinni.