Ragnar Þór Ingólfsson, formaður VR, segir að verkalýðshreyfingin hafi, þrátt fyrir úrtölur, aldrei verið í betri formi en nú til að sækja fram og sækja kjarabætur fyrir launþega. Ástæðan sé sú að slitið hafi verið á tengsl við valdablokkir samfélagsins.
„Sú kjaralota sem við stöndum í nú verður sú mikilvægasta í áratugi. Í eftirmálum hrunsins var verkalýðshreyfingin samofin valdablokk stjórnmálanna. Eftir áralöng teboð og vinaleg samtöl með sérhagsmunaöflum og stjórnmálunum gat hreyfingin sig hvergi hreyft án þess að stíga á tærnar á sjálfri sér,“ skrifar Ragnar Þór í aðsendri grein á Vísi, í tilefni af 1. maí, sem ber yfirskriftina Rísum upp.
Ragnar Þór er herskár í greininni og boðar að atvinnurekendur eigi von kraftmiklum mótaðila í komandi viðræðum.
„Ef einhver saknar þess tíma þegar duglaus og meðvirk verkalýðshreyfingin hjakkaði með tebolla í hönd í hjólfari meðvirkni og hræðslu þá mun það ekki gerast á okkar vakt.
Í eftirmálum hrunsin gat verkalýðshreyfingin ekki gengið upp lágreistan stiga án þess að mæðast og gefast upp. Í dag höfum við úthald og kjark, áræðni og dug til að taka slaginn fyrir alvöru. Og við munum gera það! Við höfum sjaldan eða aldrei verið í betra formi til þess,“ skrifar Ragnar Þór.
Hann hvetur alla sem vettlingi geta valdið til að mæta í kröfugöngu í dag og segir að fleiri aðgerðir séu yfirvofandi.
„Við munum láta til skarar skríða fljótlega. Við munum mótmæla á Austurvelli og við munum mótmæla fyrir framan Seðlabankann og við munum mótmæla hvar og hvenær sem þurfa þykir. Við munum leggja niður störf og við munum gera það sem þarf til að snúa þessari ríkisstjórn og Seðlabankanum af braut eyðileggingar og kúgunar. Okkur mun takast þetta með samtakamætti okkar allra,“ skrifar formaðurinn og klikkir út með eftirfarandi orðum:
„Spillingin er sjálfnærandi og hefur hreiðrað um sig alls staðar í stjórnsýslunni. Það er aðeins ein leið til að vinna bug á henni.“
