Ragnar Þór Ingólfsson, formaður VR, segir að ekkert sé fjarri sanni en að Elva Hrönn Hjartardóttir, sérfræðingur á þróunarsviði VR, muni missa vinnuna sína ef Ragnar hefur betur í formannsslaginum sem nú er í algleymi. Fullyrðir Ragnar að hún hafi sjálf sagt að hún muni segja starfi sínu lausu.
Elva Hrönn er eini mótframbjóðandinn gegn Ragnari Þór en formanns- og stjórnarkjör í VR hófst í gærmorgun og mun standa yfir í rúmlega viku, eða til hádegis næsta miðvikudags. Kosningabaráttan var í skugga kjaradeilu Eflingar og SA lengi vel en sprakk upp á yfirborðið um síðustu helgi þegar frambjóðendurnir tókust harkalega á í Silfrinu á RÚV. Í morgun birtist svo viðtal við Elvu Hrönn í Dagmálum Morgunblaðsins þar sem hún fullyrti að Ragnar Þór hefði gert sér það ljóst að henni væri ekki stætt í starfi ef að hann yrði endurkjörinn. Það segir Ragnar að sé ósatt.
„Ekkert er fjarri sanni í þeim efnum og reyndar var það þannig að þegar hún tilkynnti mér að hún ætlaði að bjóða sig fram tók hún það skýrt fram, að fyrra bragði, að hún myndi láta af störfum fari kosningin ekki á hennar veg.
Svo því sé haldið til haga, og þarf ég líklega ekki að taka það fram, þá er starf formanns VR undir á tveggja ára fresti hjá félaginu. Ég hef hins vegar ekki haft hugmyndarflug í að nota það sem sérstakt kosningamál hvorki nú né nokkurn tíma. Og það sama má örugglega segja um kjörna fulltrúa almennt,“ skrifar Ragnar í færslu á Facebook-síðu sinni.
Hann segist óska þessa að Elva Hrönn einbeiti sér frekar að málefnum og lausnum frekar en slíkum dylgjum.
„Starf forystufólks í stéttarfélögum snýst fyrst og síðast um hagsmuni félagsfólks. Ég kalla eftir frekari innsýn í þau málefni, lausnir og hugmyndir sem mótframbjóðandi minn hefur fram að færa heldur en að dylgja um að ég eða aðrir hafi með einhverjum hætti ógnað starfsöryggi hennar persónulega, sem er fjarri sanni,“ skrifar Ragnar.
Hann segir að mikið sé í húfi enda eru, að hans mati, mikilvægustu kjaraviðræður síðari ára framundan þar sem „framtíð og afkomuöryggi fólks á húsnæðismarkaði er undir.“
