Kolbrún Baldursdóttir, borgarfulltrúi Flokks fólksins, segir að Dagur B. Eggertsson borgarstjóri sé við það að gera afdrifarík mistök í starfi. Hún gagnrýnir harðlega áform borgarinnar um að leggja niður Borgarskjalasafnið.
Kolbrún ritar í pistli sem birtist í Morgunblaðinu í dag að það sæti furðu að réttlæta niðurlagningu Borgarskjalasafnsins með vísan í sparnað.
„Borgarstjóri er að fylgja eftir vondri og eiginlega óskiljanlegri ráðgjöf einhverra, að öllum líkindum frá ákveðnum embættismönnum.
Farið var á svig við allt samráð og samvinnu við starfsmenn og borgarskjalavörð og kom ákvörðun um niðurlagningu safnsins eins og blaut tuska í andlit þeirra. Ekki er vitað hvað gera á við gríðarleg verðmæti sem safnið heldur utan um eða þjónustuna sem það veitir.“
Kolbrún segir að skýrslan sem KPMG vann fyrir borgina sé full af sérkennilegum staðhæfingum og þar sé meintur sparnaður við aðgerðina „stórlega ýktur“.
Til dæmis sé reiknað með að eyða þurfi milljörðum í skrifstofur fyrir safnið þar sem það eigi að víkja úr Grófinni. Hins vegar sé þar miðað við áratugagamla greiningu á húsnæðisþörf sem var unnin fyrir tíma starfrænnar geymslu. Eins sé í skýrslunni sagt að það þurfi að ráða fleira starfsfólk, en þá fullyrðingu kannast borgarskjalavörður ekki við.
Skýrslan hafi líka verið unnin án þess að ítarlega hafi verið rætt við borgarskjalavörð, en samt sé það einmitt sá aðili sem best hljóti að þekkja þarfir og stöðu safnsins.
Eins megi í skýrslunni finna ávirðingar á borgarskjalavörð og honum ekki veittur andmælaréttur gagnvart þeirri gagnrýni.
Kolbrún rekur að Borgarskjalasafn heyri undir sviðsstjóra þjónustu- og nýsköpunarsviðs (ÞON). Heildarrekstrarkostnaður safnsins sé innan við 200 milljónir króna á ári, þar af launakostnaður vel undir 100 milljónum, en á sama tíma hafi ÞON fengið til ráðstöfunar yfir þrjá milljarða á ári undanfarin ár í þróunarverkefni, tilraunir og uppgötvunarvinnu. Veltir Kolbrún því fyrir sér hvort ekki væri lag fyrir KPMG að gera úttekt á því starfi og sjá hvort þar væri hægt að spara.
Hún segir að málið veki upp áleitnar spurningar. Eins og til dæmis hvort Þjóðskjalasafn sé tilbúið að taka við Borgarskjalasafni hvert sé kostnaðarmat af slíku verkefni og hvað gæti borgin þurft að greiða með safninu við þann flutning.
„Hér stefnir í að borgarstjóri geri afdrifarík mistök í starfi. Við í minnihlutanum þurfum að horfa upp á þennan vonda gjörning og getum ekkert gert. Borgarbúar og framtíðarborgarbúar munu líða fyrir þetta. Sagnfræðiheimurinn er í uppnámi. Sagnfræðingafélagið staðfestir að fyrirhugaðar breytingar yrðu mikil afturför. Slíkt safn sem Borgarskjalasafn veitir almenningi aðgang að sögu sinni, varðveitir sögu einstaklinga og stofnana á svæðinu. Þannig þjónar Borgarskjalasafnið íbúum borgarinnar öllum, nemendum á hverju skólastigi, stjórnmálamönnum, embættismönnum og fræðasamfélaginu af mikilli fagmennsku eins og segir í ályktun Sagnfræðifélagsins.“
