Þröstur V. Söring hefur verið ráðinn framkvæmdastjóri eignasviðs Sjómannadagsráðs og Naustavarar og tók hann til starfa um áramótin. Fasteignir í eigu SDR telja um 100.000 fermetra og fyrirhugaðar eru umtalsverðar framkvæmdir á næstu misserum og árum, meðal annars vegna stækkunar Hrafnistuheimila og byggingar leiguíbúða fyrir 60 ára og eldri á vegum Naustavarar. Spurn eftir þeim íbúðum, sem ávallt eru staðsettar í nágrenni og tengslum við hjúkrunarheimili Hrafnistu, hefur aukist gríðarlega á undanförnum árum. Auk núverandi reksturs yfir 250 slíkra íbúða er um þessar mundir unnið að byggingu tæplega 100 íbúða til viðbótar.

Þröstur hefur á síðustu árum verið framkvæmdastjóri Þróunar og framkvæmda hjá Framkvæmdasýslunni – Ríkiseignum. Áður starfaði hann hjá Isavia sem framkvæmdastjóri Rekstrarsviðs Keflavíkurflugvallar og bar þar meðal annars ábyrgð á rekstri flugvallarins, öryggisdeildar, flugturns, og farþegaþjónustu.

„Ég hef eins og svo margir aðrir lengi dáðst að því hvað Sjómannadagsráð hefur staðið vel að öllum sínum rekstri, þjónustu og uppbyggingu í þágu eldra fólks. Starfsemi og áframhaldandi uppbygging Naustavarar með leiguíbúðir fyrir eldra fólk í nálægð við þjónustukjarna hjúkrunarheimilanna er bæði stórt verkefni í eignastýringu og nýframkvæmdum. Ég hlakka til samstarfs við það úrvalsfólk sem hér er í því mikilvæga hlutverki sem SDR og Naustavör gegna,“ segir Þröstur.

„Ég býð Þröst hjartanlega velkominn til starfa og vænti mikils af reynslu hans og þekkingu í þeim viðamiklu verkefnum sem eignasvið SDR og Naustavör takast á við alla daga. Í yfir 80 ára sögu Sjómannadagsráðs hefur starfsemin vaxið langt umfram það sem fyrirhugað var í upphafi og ljóst er að ekkert lát verður á víðtækri áframhaldandi uppbyggingu. Þröstur kemur til okkar með mikla þekkingu og reynslu í farteskinu sem við munum án efa njóta góðs af,“ segir Aríel Pétursson formaður stjórnar SDR.