Dagur B. Eggertsson, borgarstjóri, ætlar ekki að bjóða sig fram til embættis formanns Samfylkingarinnar á landsfundi flokksins í október en þá verður kosið um arftaka Loga Einarsson. Dagur útilokar hins vegar ekki þátttöku í landsmálum. Kristrún Frostadóttir, þingmaður, sem hefur verið orðuð við formannsframboð, mun að sögn boða til fundar með stuðningsfólki sínu á morgun og er talið að þar muni hún tilkynna um formannsframboð sitt.

Fréttablaðið hefur eftir Degi að hann hafi skynjað mikinn stuðning: „Fólk hefur kallað eftir nýrri ríkisstjórn sem yrði mynduð frá vinstri yfir á miðjuna svipað og í Reykjavík. En ég er að hefja nýtt kjörtímabil í borginni og á ekki sæti á þingi. Þess vegna var langsótt að ég byði mig fram til formennsku í flokknum.“

Aðspurður hvort það sé útilokað að hann bjóði sig fram til formanns sagði hann svo vera. Hans hlutverk sé frekar að styðja þá sem verða valdir til forystu og sagðist hann telja að það skipti mjög miklu að Samfylkingin nái fyrri styrk.

Þegar Dagur var spurður hvort hann hyggist bjóða sig fram til Alþingis sagðist hann aldrei hafa útilokað það en hafi heldur ekki stefnt sérstaklega að því.

Nánar er hægt að lesa um málið í Fréttablaðinu í dag.

Morgunblaðið skýrir síðan frá því í dag að Kristrún Frostadóttir muni boða stuðningsfólk sitt á fund á morgun og sé talið að þar muni hún kynna framboð sitt til formanns á landsfundinum. Blaðið segist hafa heimildir fyrir að fundur Kristrúnar hefjist klukkan 15 á morgun í Iðnó. Kristrún vildi ekkert segja um málið nema hvað að fundarboð verði sent út á morgun.