Óhætt er að segja að enn af sigurvegurum nýlokins prófkjörs Sjálfstæðisflokksins sé nýliðinn Helgi Áss Grétarsson. Helgi Áss, sem er menntaður lögfræðingur, hefur aldrei áður látið til sín taka í pólitík og ákvað með frekar skömmum fyrirvara að slá til og skella sér í slaginn. Að endingu náði hann sjöunda sæti prófkjörsins af 26 frambjóðendum og fyrir ofan hann voru aðeins fólk sem hefur reynslu af prófkjörsbaráttu, núverandi borgarfulltrúar eða varaþingmenn.
Skýrar víglínur voru til staðar í prófkjörinu, annarsvegar frjálslyndari armur sem að Hildur Björnsdóttir, veitti forystu, og síðan íhaldsarmur sem flykkti sér á bak við Ragnhildi Öldu Vilhjálmsdóttur sem einnig bauð sig fram í oddvitasæti. Þótt áherslur Helga Áss, sérstaklega andstaða hans við Borgarlínu, falli vel við áherslur íhaldsarmsins þá gerir það árangur hans enn athyglisverðari að hann var ekki í bandalagi við neina aðra frambjóðendur.
Í samtali við DV kvaðst Helgi Áss vera himinlifandi með niðurstöðuna. „Að ná 7. sæti sem nýliði í stjórnmálum er frábær niðurstaða fyrir mig í prófkjörinu. Þegar ég ákvað að bjóða fram krafta mína lá ljóst fyrir að það yrði á mínum forsendum. Tengsl mín innan Sjálfstæðisflokksins voru takmörkuð enda hafði ég fram að framboðinu verið tiltölulega óvirkur almennur félagsmaður flokksins. Einhvers konar samvinna við aðra í hópi frambjóðenda var ekki fyrir hendi,“ segir Helgi Áss.
Hann hefur undanfarin athygli vakið mikla athygli fyrir greinaskrif sín, ekki síst þar sem hann hefur komið til varnar fórnarlömbum svokallaðrar slaufunarmenningar. Líklega er hans þekktasta grein „Ég er Ingó veðurguð“ sem sló nánast öll aðsóknarmet á DV þegar henni var slegið upp í frétt.
Helgi Áss segir að hann hafi þegar fundið fyrir góðum meðbyr við framboði sínu og greinilegt að málflutningur hans undanfarið hafi fallið vel í kramið meðal Sjálfstæðisfólks. „Margir sjálfboðaliðar lögðu hönd á plóg fyrir framboð mitt sem og öflugir fagmenn, svo sem á sviði grafískrar hönnunar og fjölmiðlunar. Framboðið fékk hins vegar mikla lyftistöng þegar hinn reyndi kosningastjóri Jón Kristinn Snæhólm kom til starfa fyrir það fyrstu vikuna í mars. Áherslurnar urðu skýrari og meira var lagt undir í kosningabaráttunni.“
Eins og gefur að skilja hafi hann einbeitt sér að skrifum um málefni borgarinnar undanfarna daga og greinilegt að þar hafi hann einnig hitt á taugar margra Sjálfstæðismanna. „ Málflutningur minn vann á eftir því sem leið á kosningabaráttuna. Ekki síst um nauðsyn þess að endurskoða hvernig borgarlínuverkefnið verði útfært og hversu mikilvægt það er að taka til í yfirbyggingu stjórnkerfis Reykjavíkurborgar.
Ég vil þakka öllum meðframbjóðendum mínum fyrir skemmtilega og heiðarlega prófkjörsbaráttu,“ segir Helgi Áss.
Auk þess að vera þekktur fyrir aðkomu sína að skák, en Helgi Áss er stórmeistari í greininni, þá vita kannski færri að hann er fyrir unglingalandsliðsmaður í knattspyrnu þar sem hann spilaði í marki og er sanntrúaður Frammari. „Nú verður stefnt að sigri Sjálfstæðisflokksins í borgarstjórnarkosningunum í vor. Eins og við Frammarar segjum – Fram til sigurs!“ segir Helgi Áss.
