Birta Karen Tryggvadóttir og Kári Freyr Kristinsson, sem leiða framboðslista til stjórnarsetu í Heimdalli, félagi ungra Sjálfstæðismanna í Reykjavík, gagnrýna ákvörðun Varðar, fulltrúaráð sjálfstæðisfélaga í Reykjavík, að loka kjörskrá tveimur vikum fyrir kjördag í prófkjöri Sjálfstæðismanna í Reykjavík. Segja þau að ákvörðunin skjóta skökku við í ljósi þess að flokkurinn hafi boðað til lýðræðisveislu fyrir nýafstaðnar alþingiskosningar. Ákvörðun Varðar sé þvert á þá stefnu.

Birta Karen og Kári Freyr leiða framboð til stjórnar í Heimdalli, félagi ungra Sjálfstæðismanna í Reykjavík, árið 2022. Með þeim bjóða tíu einstaklingar sig fram í stjórn og sex í varastjórn. Aðalfundur félagsins fer fram daganna 23. – 25. febrúar.

Í fréttatilkynningu kemur fram að framboðið gagnrýnir ákvörðun stjórnar Varðar um að loka kjörskránni tveimur vikum fyrir kjördag í prófkjöri Sjálfstæðismanna í Reykjavík.

„Í alþingiskosningunum í haust státaði flokkurinn sig af því að boða til lýðræðisveislu en þessi ákvörðun stjórnar Varðar gengur þvert á þessa stefnu. Með því að loka kjörskránni tveimur vikum fyrir kjördag er stjórn Varðar að setja skorður á hvaða flokksfélagar geta kosið og eru með því að takmarka áhrif flokksmanna og jafnframt möguleika flokksins til að fjölga skráðum flokksmönnuum. Með þessari ákvörðun má spyrja hvort að stjórn Varðar ætli að setja tímamörk á það hvenær skráðir félagsfélagar teljist fullgildir aðilar innan flokksins og hvers vegna tveggja vikna frestur sé tímamörkin fremur en eitt eða jafnvel 10 ár,“ segir í tilkynningunni.

Þá telja frambjóðendurnir að þessi ákvörðun takmarki þátttöku ungs fólks í prófkjörinu.

„Ungt fólk er almennt ekki skráð í stjórnmálaflokka en fjölmennt prófkjör er líklegt til að draga að og vekja áhuga ungs fólks á flokknum og stjórnmálum almennt sem hlýtur að teljast fagnaðarefni. Jafnframt eru möguleikar yngri og nýrra frambjóðenda á árangri takmarkaðir og möguleikar flokksins á að stækka því settar skorður. Sjálfstæðisflokkurinn er ekki og á ekki að vera lokaður klúbbur heldur opin fjöldahreyfing þeirra sem aðhyllast sjálfstæðsstefnunni. “