Samtök Demókrata, sem ráða yfir mörgum milljónum dollara, undirbúa sig nú undir væntanlega rannsókn Repúblikana á Joe Biden þegar þeir taka við völdum í fulltrúadeild þingsins í janúar.

Þessi samtök eða hópar hafa á síðustu vikum undirbúið sig undir árásir Repúblikana á Biden en hafa farið mjög leynt með þessa vinnu sína.

Repúblikanar hafa boðað rannsóknir á Biden og embættisfærslum hans þegar þeir taka við völdum í fulltrúadeildinni. Þetta er svar þeirra við rannsókn núverandi meirihluta Demókrata í fulltrúadeildinni á einu og öðru er varðar Donald Trump, fyrrum forseta.

Samtökin tengjast Hvíta húsinu ekki beint. Þau ætla að reyna að koma í veg fyrir árásir Repúblikana, meðal annars með því að grafa upp eitt og annað misjafnt um Repúblikana.

NBC News skýrir frá þessu en sjónvarpsstöðin ræddi nýlega við leiðtoga þriggja af þessum samtökum.

Stöðin segir að samtökin hafi margar milljónir dollara til umráða og verða þær meðal annars notaðar til að ráða rannsakendur og samskiptafulltrúa til starfa til að vinna gegn þrýstingi Repúblikana á Hvíta húsið og Biden. Samtímis munu samtökin undirbúa sig undir hugsanlegt forsetaframboð Donald Trump 2024.