Í gær var svo komið að því að hann kæmi með þessa „stórfrétt“. Margir biðu eflaust spenntir, þá sérstaklega einarðir stuðningsmenn Trump, eftir fréttinni og vafalaust hafa margir talið að nú myndi hann varpa einhverri pólitískri sprengju.
En miðað við viðbrögð fjölmiðla og almennings þá er óhætt að segja að „stórfrétt“ Trump hafi nú ekki þótt ýkja merkileg.
Í myndbandi, sem Trump birti í gær, kemur fram að þetta snúist allt um ofurhetjukort sem hann er að gefa út. Það kemur væntanlega ekki á óvart að kortin snúast um hann og að hann er myndefnið á kortunum enda erfitt að finna fólk sem er ánægðra með sjálft sig.
„Þú skalt verða þér úti um kortin núna,“ segir Trump í myndbandinu.
„Takmarkað upplag af kortum með frábærum teikningum af lífi mínu og ferli,“ segir hann og lofar væntanlegum kaupendum spennandi kortum.
Kortin kosta 99 dollara stykkið og verða því væntanlega drjúg tekjulind ef fólk er reiðubúið til að kaupa þau.
„Þetta getur verið hin fullkomna jólagjöf,“ segir Trump í myndbandi á vefsíðunni CollecttrumpCards sem er vefsíða kortanna.
Ginger Gibson, ritstjóri NBC í Washington, skrifaði: „Hin stóra tilkynning Donald Trump virðist vera að hann heldur enn að fólk vilji gefa honum 99 dollara þegar hann biður um það.“ The Guardian skýrir frá þessu.
John Kiriakou, rithöfundur, tjáði sig um málið á Twitter og sagði: „Einmitt þegar þú hélst að hann gæti ekki niðurlægt sjálfan sig meira.“
„Þetta er á allan hátt móðursýkislega heimskulegra en ég átti von á,“ skrifaði einn Twitternotandi.
Í myndbandinu segir Trump að allir sem kaupa 45 eða fleiri „Trump Digital Trading Cards“ (það er nafnið á kortunum) fái miða í svokallaðan galakvöldverð með Trump í Flórída.
Á vefsíðunni, CollecttrumpCards, eru síðan leikir með verðlaunum á borð við fund með Trump, 10 mínútna Zoomfundi með honum, og klukkustund í golfi á Trump Golf Palm Beach.
Variet segir að Trump vonist til að geta fengið enn meiri peninga með því að selja kort sem sýna hann í sjaldgæfum fantasíuaðstæðum.
Margir bandarískir fjölmiðlar telja einsýnt að Trump setji þessi kort á markaðinn því hann sé fjárþurfi.
Á vef CollecttrumpCards kemur fram að fyrsta upplag kortanna sé 45.000 stykki og ef hvert þeirra selst á 99 dollara þá er nú um ansi góða upphæð að ræða sem Trump fær í vasann.
