„Ég kem með mikilvæg skilaboð á morgun. Takk fyrir,“ segir hann í myndbandinu. Því næst birtist mynd af Trump í ofurhetjubúningi. Hann rífur skyrtuna upp og afhjúpar þröngan búning með „T“ á bringunni. Einhverskonar lasergeislar skjótast úr brennandi augum hans.
Myndbandið hefur vakið mikla athygli og þykir mörgum það ansi undarlegt. New York Post, sem er íhaldssamt dagblað, segir það vera „furðulegt“.
Spurningin er hvort myndbandið og „stórfréttin“ tengist fyrirætlunum Trump um að verða forsetaframbjóðandi Repúblikanaflokksins 2024.
Ný skoðanakönnum, sem Wall Street Journal, lét gera sýnir að Ron DeSantis, ríkisstjóri í Flórída, nýtur nú stuðnings 52% stuðningsmanna Repúblikanaflokksins en 38% styðja Trump. DeSantis hefur ekki tilkynnt um framboð en orðrómar hafa lengi verið á kreiki um að hann hyggist taka slaginn.
Trump hefur verið í miklum mótvindi síðustu vikur og hvert vandræðamálið á fætur öðru hefur komið upp. Þar má meðal annars nefna ummæli hans um að það eigi að ógilda stjórnarskrá landsins til að hann geti strax tekið við forsetaembættinu. Það hefur einnig hneykslað fólk að hann snæddi saman með Kayne West og Nick Fuentes. West hefur verið mikið í fréttum fyrir neikvæð ummæli hans um gyðinga og Fuentes neitar því að Helförin hafi átt sér stað og er þekktur kynþáttahatari. Þá var Trump-samsteypan nýlega fundin sek um skattsvik í New York.
Árangur Repúblikana í þingkosningunum í nóvember þótti ekki góður. Þeim tókst ekki að ná meirihluta í öldungadeildinni en náðu meirihluta í fulltrúadeildinni. Hafa andstæðingar Trump bent á að þetta voru þriðju kosningarnar í röð, undir forystu Trump, þar sem Repúblikanar töpuðu.
