„Vandi Sjálfstæðisflokksins, sem heldur nú landsfund sinn eftir margra ára bið, er ekkert endilega fólginn í forystu hans, heldur miklu fremur í stefnunni, sem er jafn óljós og hún hefur afvegaleiðst í pólitískri framkvæmd.“

Svona hefst grein sem Sigmundur Ernir Rúnarsson, ritstjóri Fréttablaðsins, skrifar í helgarblað Fréttablaðsins. Sigmundur segir að í fyrri tíð hafi Sjálfstæðisflokkurinn verið á móti því að báknið þendist út að óþörfu en að nú sé staðan önur. „Í valdatíð flokksins á síðustu áratugum hefur stofnanaveldið vaxið verulega og það sem meira er, ríkisstarfsmenn leiða nú launaþensluna í samfélaginu, einkafyrirtækjum til tjóns og vansa,“ segir hann.

„Þá hefur skattastefna flokksins í reyndinni verið heldur í átt til þyngri byrða fyrir landsmenn, en nú síðast, svo dæmi sé tekið, á að hækka áfengisgjaldið umtalsvert, þvert á orð sjálfs fjármálaráðherra sem hefur opinberlega goldið varhug við auknum álögum á þeim pósti.“

Sigmundur segir þó að merkilegustu sinnaskipti flokksins séu í utanríkismálunum. „Enginn flokkur talaði jafn duglega fyrir vestrænni samvinnu og Sjálfstæðisflokkurinn á síðustu öld. Enginn flokkur varði jafn rækilega gildi skoðanafrelsis og frjálsræðis í samskiptum fólks og þjóðvelda. Á því sviði var flokkurinn upp á sitt besta – og átti raunar senuna, en hjáróma raddir annarra flokka í þeim samanburði voru á tíðum ámátlegar,“ segir hann.

Nú sé flokkurinn „kominn inn í eigin skel“ þegar kemur að Evrópumálunum samkvæmt Sigmundi. „Hann talar þvert á það sem allir aðrir hægriflokkar í Evrópu boða, um mikilvægi samstöðunnar og samstarfsins innan álfunnar. Gamli íhaldsflokkurinn á Íslandi er meira að segja búinn að lauma sér hægra megin við öfgasinnaða þjóðernisflokka Evrópu í þessum efnum,“ segir hann.

„Og það er auðvitað sláandi að á meðan allt öfgahægrið í álfunni áttar sig á því að sameinuð Evrópa er kjarni tilveru okkar, situr Sjálfstæðisflokkurinn við sinn keip – og hatast út í Evrópusambandið.“

Sigmundur bendir þá á að Svíþjóðardemókratar, AfD í Þýskalandi og flokkur Le Pen í Frakklandi séu ekki á móti Evrópusambandinu. „Meira að segja nýnasistaflokkur Gorgiu Meloni á Ítalíu, hafa allir látið af andstöðu sinni við Evrópusambandið og lagst á sveif með því á seinni árum. Og það eru út af fyrir sig stórtíðindi að svona þjóðernissinnaðir hægriflokkar skuli yfirleitt skipta um skoðun í þessu efni,“ segir hann.

„En Sjálfstæðisflokkurinn ætlar sér að vera sér á báti í þessum efnum. Í Evrópumálum ætlar hann að vera hægra megin við öfgahægrið í Evrópu. Hann langar helst að vera heilagri en Miðflokkurinn í þessum efnum. Og uppsker eftir því.“