„Það er RÚV sem aflúsaði Björn Inga eftir að hann gekk hér um og ryksugað upp fjölmiðla sem leppur auðmanna í þeim eina tilgangi að eyðileggja þá. Íslenskir fjölmiðlar eru verri eftir ævintýri Björns Inga og félaga. Það ætti því engum að koma á óvart að RÚV sé líka sá miðill sem opnar upp á gátt og gagnrýnislaust fyrir þeim sömu og nú vilja gera flóttafólk að blóraböggul fyrir hruni stofnana almennings. Flóttafólk og hælisleitendur bera enga ábyrgð á þessum vanda og það er viðbjóðslegt að sjá ríkisútvarpið sem viljugt verkfæri í skrímslavæðingu þeirra sem hingað leita.“
Á þessum orðum hefst pistill Atla Þórs Fanndals, framkvæmdastjóra Íslandsdeildar Transparency International, á Facebook en hann er afar ósáttur við efnistök Silfursins á RÚV í gær. Þar voru málefni hælisleitenda og flóttafólks rædd í þaula en gestir þáttarins, sem stjórnað var af Agli Helgasyni, voru þau Bryndís Haraldsdóttir, þingmaður Sjálfstæðisflokksins, Þorbjörg Sigríður Gunnlaugsdóttir, þingmaður Viðreisnar, Björn Ingi Hrafnsson, fjölmiðlamaður og Gunnar Smári Egilsson, formaður framkvæmdaráðs Sósíalistaflokksins.
Í þættinum sagði Gunnar Smári umræðuna um málefni flóttafólks vera siðlausa og að Jón Gunnarsson, dómsmálaráðherra, væri að glæpavæða flóttamenn og kenna þeim um bágborna stöðu grunnkerfa samfélagsins sem þeir bæru enga sök á. Bryndís og Björn Ingi sögðu hins vegar að mikilvægt væri að ræða málin opinskátt og setja þyrfti skynsamlegar reglur varðandi komu flóttafólks til landsins.
„Það þarf engan Daily Mail á Íslandi þegar ríkisútvarpið kemur fram við þá sem bera þennan skelfilega rasisma á borð sem velkomna gesti. Aftur og aftur og aftur… Það er ekki einu sinni sandkorn af sannleika í því að hælisleitendur og flóttafólk sé að valda hruni stofnana samfélagsins, það er ekkert til í því að milljónir vilji flýja hingað og ekki til nein gögn, rannsókn eða samantekt á þátt glæpamanna í að lokka hingað hælisleitendur. Ég er ekki að neita því að slíkt gerist en það eru til sögusagnir og slúður en þetta hefur aldrei verið rannsakað eða tekið saman. Það geta fimm hundruð milljónir flutt hingað á morgun og hafa mátt í áratugi en samt gerist það ekki. Ég elska RÚV og vill sjá þessa stofnun vaxa og dafna en þvílík skömm sem er að því að bera svona rasisma á borð og koma fram við eins og bara enn einn angann af eðlilegri umræðu. Hvað er eiginlega í gangi á stofnun sem sér ekkert að því að bera bara á borð hvaða helvítis bull sem er,“ skrifar Atli Þór ennfremur og greinilega verulega misboðið yfir efnistökunum.
Hann bendir á að undanfarið hafi verið talað um bakslag í mannréttindabaráttu hinsegin fólks. „Við í hinsegin samfélaginu höfum þó allavega ekki þurft að horfa upp á RÚV sem farartæki bakslagsins eins og hælisleitendur, flóttafólk og innflytjendur máttu þola í Silfrinu í dag. Þetta er ógeðslegt,“ skrifar Atli Þór.
Hann segir að eitthvað verulega mikið sé að gæðaeftirliti RÚV eftir fólk trúi því í alvörunni að það sé opin og lýðræðisleg umræða að ráðherra og skoðanabræður hans eigi „bara að fá að misnota ríkisútvarpið með svona rasískum þvættingi gagnrýnislaust þrátt fyrir að árum saman hafi aldrei nein gögn komið fram sem styðja þetta rugl. Það er bara ekkert lýðræðislegt við að RÚV sé notað eins og útvarpsstöð í Rúanda.“
