Ragnar Þór Ingólfsson, formaður VR, og Ólöf Helga Adolfsdóttir, ritari Eflingar, voru gestir Egils Helgasonar í Silfrinu á RÚV í dag. Ragnar og Ólöf sækjast bæði eftir því að verða forseti Alþýðusambands Íslands.
Verkalýðsbaráttan hefur verið stormasöm á árinu, sérstaklega eftir hópuppsagnir Sólveigar Önnu Jónsdóttur, formanns Eflingar, á skrifstofufólki Eflingar. Hópuppsagnirnar voru harðlega gagnrýndar og fordæmdar úr mörgum áttum en athygli vakti að engin fordæming kom frá VR. Stundin greindi frá því í vor að Ragnar Þór hafi lagst gegn því að trúnaðarráð félagsins myndi senda frá sér ályktun, þar sem hópuppsagnir Eflingar yrðu fordæmdar.
Þessar hópuppsagnir komu oftar en einu sinni til tals í Silfrinu í dag en segja má að það hafi andað köldu milli Ragnars og Ólafar. „Nú erum við að horfa fram á það að mögulegur næsti forseti ASÍ ætlar ekki að hafa það í farteskinu að geta fordæmt hópuppsagnir í nafni skipulagsbreytinga – einfaldlega vegna þess að var Sólveig Anna sem stóð í þessum hópuppsögnum,“ sagði Ólöf þegar rætt var um hópuppsagnirnar og viðbrögð VR við þeim.
„Ég skal alveg viðurkenna það að þetta mál var stjórn VR mjög erfitt, við ræddum það fram og til baka, en á endanum náðum við niðurstöðu sem allir gátu sætt sig við. Það var einróma niðurstaða að fara fram með þessum hætti, einblína á það að aðstoða fólkið sem varð fyrir þessum hópuppsögnum,“ svaraði Ragnar þá „En eins og staðan er í dag þá verðum við… við þurfum að ákveða á þinginu hvort þessi átök eigi að halda áfram, á þetta að snúast um Eflingu eða á þetta að snúast um að sameina krafta okkar í þeim verkefnum sem eru fram undan.“
Ólöf sagðist að sjálfsögðu vera sammála því að það þurfi á sameiningu að halda innan hreyfingarinnar.
„Það er náttúrulega alltaf ágreiningar innan hreyfingarinnar, það er rosalega eðlilegt, en hvort þeir eigi alltaf að rata í fjölmiðla er aftur á móti hin spurningin. Hvort það sé ekki í lagi að láta málin fara í réttan farver áður en við förum með einhverjar upphrópanir í fjölmiðla,“ sagði hún.
Þá greip Ragnar Þór inn í: „Ég fékk nú vantraust frá ykkur bara fyrir örstuttu síðan í sameiginlegri grein, þér hefði kannski verið nær að setjast niður og ræða málin.“
Ólöf sagðist standa við greinina sem um ræðir. „Ég er, eins og ég segi hér og nú, ég tel þig ekki hafa trúverðugleika til þess að leiða hreyfinguna. Ég get ekki séð að forseti ASÍ geti verið einstaklingur sem hefur ekki fordæmt hópuppsagnir.“
Við þetta sauð upp úr milli Ólafar og Ragnars sem fóru bæði að tala ofan í hvort annað. „Sem hefur ekki tekið afstöðu með öðrum aðila í hatrömmum deilum, þetta snýst um það, þið eruð að taka þessi hatrömmu átök inn á ASÍ þingið, hvernig væri að fara að hugsa um fólkið okkar?“ sagði Ragnar.
Á meðan útskýrði Ólöf að málið snérist ekki um Sólveigu heldur um Eflingu sem atvinnurekanda.
„Þetta er ekki annar aðili, þetta snýst um atvinnurekanda og launafólk, og þú tókst afstöðu. Hvar heldur þú að starfsfólk Eflingar sé í dag? Heldurðu að það sé í betri stöðu heldur en fyrir uppsagnirnar? Nei. Ég get alveg sagt þér það að þarna var ekki verið að tala um stéttarfélag og annan aðila, þarna var verið að tala um atvinnurekanda. Efling var atvinnurekandi í þessu sérstaka máli, þegar atvinnurekandinn sagði upp öllu sínu skrifstofufólki vegna skipulagsbreytinga. Það er punkturinn, það á ekki að skipta máli hver atvinnurekandinn er.“
