„Ég vil biðjast afsökunar á mínum hlut í Landsdómsmálinu.“ Á þessum orðum hefst Facebook-færsla Magnúsar Orra Marínarsonar Schram, fyrrum alþingismanns, sem hann birti fyrir stundu.
Hann rifjar upp að fyrir tólf árum var lögð fram tillaga á Alþingi að vísa máli Geirs H. Haarde, fyrrverandi forsætisráðherra og þriggja annarra ráðherra, Ingibjargar Sólrúnar Gísladóttur, Árna Matthíesen og Björgvins G. Sigurðssonar til landsdóms. Rannsóknarskýrla Alþingis hafði nýlega komið út og hávær umræða um uppgjör á verkum ráðherranna á meðan efnahagshrunið gekk yfir landið.
Að endingu ákvað meirihluti Alþingis að vísa aðeins máli Geirs H. Haarde til landsdóms en afstaða Magnúsar Orra var sú að vísa ætti máli Geirs, Ingibjargar Sólrúnar og Árna til dómsins.
„Þeirri ákvörðun sé ég eftir. Í dag vildi ég óska þess að ég hefði haft hugrekki til að tala fyrir því að umfjöllun um ábyrgð ráðherra hefði lokið á vettvangi nefndarinnar. Á sínum tíma lét ég andann í þjóðfélaginu hafa áhrif á mína afstöðu, þegar það hefði verið rétt ákvörðun að vísa engum málum til Landsdóms,“ skrifar Magnús Orri.
Hann segist sannfærður um að fjórmenningarnir sem voru til umfjöllunar hafi unnið að heilindum við erfið störf í yfirþyrmandi aðstæðum.
„Ég hef persónulega beðið þau afsökunar á ábyrgð minni og vil einnig gera það hér, með opinberum hætti. Ég var nýlega spurður að því hvort ég væri enn sömu skoðunar varðandi ákvörðun nefndarinnar og Alþingis, um að vísa málum ráðherranna til Landsdóms og svarið er að ég er það ekki. Málið hefur lengi hvílt þungt á mér og þótt ekki sé hægt að taka aftur þessi mistök þá er mikilvægt að gangast við þeim,“ segir í yfirlýsingu Magnúsar Orra.
