Krónan svarar ákalli almennings og stjórnvalda um að leggja lið baráttunni gegn verðbólgu og frystir verð á 240 vörunúmerum undir vörumerkjum Krónunnar og First Price frá og með deginum í dag. Vörur undir vörumerkjum Krónunnar og First Price spanna fjölbreytt vöruval og eru ódýrustu valkostirnir í sínum vöruflokkum. Þetta er eitt af skrefum Krónunnar til að reyna að sporna við hækkandi vöruverði og draga úr áhrifum verðbólgu í matarinnkaupum viðskiptavina. 

„Við erum með fleiri aðgerðir í undirbúningi en stígum þetta skref til að sýna strax í verki að við stöndum með almenningi og erum að reyna að sporna við þeim verðhækkunum sem á okkur dynja. Þrátt fyrir að við hjá Krónunni höfum reynt með öllum tiltækum ráðum að berjast gegn hækkunum frá birgjum og framleiðendum sem koma að mestu til vegna hækkana á hrávöru, flutnings- og rekstrarkostnaði, er hækkun matvælaverðs hér á landi slík að allir landsmenn finna fyrir henni við dagleg innkaup. Með frystingu verðs á þessum ákveðnu vörumerkjum, Krónuvörum og First Price, geta viðskiptavinir okkar að minnsta kosti keypt töluverðan hlut sinnar dagvöru á föstu verðlagi,“ segir Ásta S. Fjeldsted, framkvæmdastjóri Krónunnar.  

Krónan hyggst halda verðinu stöðugu fram að áramótum til að byrja með. Komi til lækkunar innkaupsverðs eða gengisstyrkingar á vörum undir þessum vörumerkjum mun Krónan lækka söluverðið sem því nemur. Komi til hækkunar á innkaupsverði eða til gengisveikingar mun sú hækkun ekki skila sér út í verðið til viðskiptavina.