Liz Cheney, þingmaður úr Repúblikanaflokknum og varaformaður rannsóknarnefndarinnar, sagði í gær að Trump hafi verið með „vel undirbúna áætlun í sjö liðum“ um hvernig ætti að snúa úrslitum forsetakosninganna við.
„Að morgni 6. janúar var ætlun Donald Trump, forseta, að sitja áfram í embætti forseta Bandaríkjanna þrátt fyrir löglega niðurstöður kosninganna 2020 og gegn stjórnarskrárbundinni skyldu hans til að láta af völdum,“ sagði Cheney í opnunarræðu sinni í gær að sögn CNN.
Hún fór ekki í smáatriðum ofan í þessa sjö liða áætlun Trump í opnunarræðunni en sagði að fólkið sem réðst á þinghúsið og barðist við lögregluna hafi verið rekið áfram af röngum ásökunum Trump um að kosningasigrinum hefði verið stolið frá honum. Hún sagði að Trump hafi kallað skrílinn saman og kveikt eldana sem leiddu til árásarinnar.
CNN fékk lýsingu á „sjö liða áætlun Trump“ hjá heimildarmanni innan rannsóknarnefndarinnar og segir að hún líti svona út:
1.Trump tók þátt í umfangsmiklum tilraunum til að dreifa röngum og sviksamlegum upplýsingum til bandarísks almenning um að kosningasigrinum hefði verið stolið frá honum.
2.Trump hafði í hyggju að skipta um dómsmálaráðherra til að tryggja að dómsmálaráðuneytið myndi styðja rangar fullyrðingar hans um kosningasvindl.
3.Trump þrýsti á Mike Pence, varaforseta, um að neita að telja atkvæði löglega kjörinna kjörmanna en það er brot á stjórnarskránni og lögum.
4. Trump þrýsti á embættismenn í ríkjum landsins og þingmenn á ríkisþingum um að breyta niðurstöðum kosninganna.
5. Lögmenn Trump og aðrir samstarfsmenn fyrirskipuðu Repúblikönum í mörgum ríkum að falsa skjöl um úrslit kosninganna og senda til þingsins og þjóðskjalasafnsins.
6. Trump kallaði ofbeldisfullan skríl saman í Washington og skipaði honum að ganga að þinghúsinu.
7. Þegar ofbeldisverk hófust við þinghúsið hunsaði Trump ítrekaðar óskir um aðstoð og greip ekki til aðgerða til að stöðva ofbeldið né bað stuðningsmenn sína um að yfirgefa þinghúsið.
