Sólveig Anna Jónsdóttir, formaður Eflingar, hefur nú greint frá því hversu margar umsóknir hafa borist um störf á skrifstofu Eflingar, en hópuppsögn þar sem öllu starfsfólki var sagt upp tók gildi í dag og voru öll störf, sem ekki voru lögð niður, auglýst.

Hún greinir frá þessu í færslu á Facebook þar sem hún sendir félögum Eflingar baráttukveðjur á verkalýðsdeginum.

„Umsóknarfrestur á störfum rann út í gær og alls bárust um það bil 250 umsóknir. Nú hefst vinnan við að skoða þær og meta.“

Sólveig Anna segir að nú um mánaðamót hafi það verið áskorun á skrifstofunni að tryggja grunnþjónustu við félagsfólk sökum fjölda þeirra starfsmanna sem nú er í veikindaleyfi, eða eins og Sólveig kallar það „fjölda-veikindi starfsfólk“, en það hafi þó tekist.

„Stjórn setti í forgang að sjúkradagpeningar yrðu greiddir út enda eru þeir ein mikilvægustu réttindi verka- og láglaunafólks, sem vegna lágra launa á lítinn eða engan sparnað, og getur samstundis lent í alvarlegum fjárhagserfiðleikum þegar veikindaréttur hefur klárast og engin laun berast frá atvinnurekanda. Á morgun verða sjúkradagpeningar greiddir frá Eflingu til um það bil 190 félaga, upp á samtals 70 milljónir. “

Sólveig segist vonast til þess að nú takist loks að fá vinnufrið hjá Eflingu svo hægt sé að einbeita sér að því er máli skiptir, að halda áfram að breyta Eflingu í öflugustu samtök verka- og láglaunafólks á Íslandi.

Hún segir atburðarás síðustu mánaða, vikna og daga hafa verið undarlega.

„Svo vægt sé tekið til orða. En mín afdráttarlausa afstaða er þó sú að við sem trúum á leikreglur lýðræðisins eigum einfaldlega að fagna tækifærunum til þess að berjast fyrir því sem við trúum á, til þess að sannfæra fólk með málefnalegum hætti um að stefna okkur sé þess virði að hún sé studd og henni fylgt.“

Félagsfundurinn á miðvikudaginn hafi falið í sér það að Sólveig Anna og félagar hennar af Baráttulistanum hafi afdráttarlaust umboð til að stýra Eflingu.

„Átökin hafa verið hörð og erfið, en þau eru þess virði.“

Sólveig beinir svo athyglinni að verkalýðsbaráttunni í sannkallaðri eldræðu til félagsmanna, en hana má lesa í færslu hennar hér fyrir neðan.