DV - Frjáls og óháður miðill

Eyjan

Kemur Jóni Ásgeiri til varna eftir „illmæli og órökstuddar dylgjur“ Ásthildar Lóu – „Jón Ásgeir hlaut engan dóm eftir íslenska efnahagshrunið“

Eyjan
Fimmtudaginn 28. apríl 2022 14:30

Ásthildur Lóa Þórsdóttir, þingmaður Flokks fólksins, ritaði í gær grein sem birtist hjá Morgunblaðinu þar sem hún fór ófögrum orðum um athafnamanninn Jón Ásgeir Jóhannesson.

Eins og margir muna var Jón Ásgeir stjórnarformaður FL Group, stærsta hluthafa í bankanum Glitni fyrir efnahagshrunið 2008. Var gjarnan talað um Jón Ásgeir sem eiganda bankans. Ásthildur segir í grein sinni að Jón Ásgeir hafi stungið af úr landi með feng sinn eftir hrunið og skilið eftir „heilt þjóðfélag í sárum“ og hafi aðrir setið eftir í „illa þefjandi súpunni sem Jón og félagar hans í honum bönkunum skildu eftir.“ Hafi þúsundir heimila setið eftir með reikninginn og minnst 15 þúsund misstu heimili sín. Nú sé ljóst að Jón sé kominn heim.

„Ekki til að biðja afsökunar á misgjörðum sínum og skaðanum sem hann olli. Nei hann er kominn til að taka meira,“ skrifaði Ásthildur en hún vísaði í grein inni til þess að fjárfestingafélagið SKEL, sem keypti í lokuðu útboði hluti af ríkinu í Íslandsbanka, hafi nú selt þá hluti, en Jón Ásgeir er stjórnarformaður SKEL.

Illmæli og órökstuddar dylgjur

Einari Þór Sverrissyni, lögmanni Jóns Ásgeirs, þótti ómaklega vegið að skjólstæðingi sínum í greininni og hefur nú svarað Ásthildi, sem hann þó rangnefnir Ásdísi.

„Ásdís Lóa Þórðardóttir alþingismaður birti grein í Morgunblaðinu í gær þar sem hún réðst með illmælum og órökstuddum dylgjum og fullyrðingum að tilteknum þjóðfélagsþegni,“ skrifar Einar.

Hann segir að ásakanir Ásthildar eigi sér enga stoð í raunveruleikanum og ætti þingmaður að vita betur en að rjúka af stað með ásakanir í garð nafngreindra einstaklinga.

„Einhver kynni að ætla að alþingismaður sem vill að borin sé virðing fyrir sér og þeirri stofnun sem hann starfar hjá myndi reyna að kynna sér málin áður en svo stórum ásökunum er kastað á einstakling, í þessu tilfelli Jón Ásgeir Jóhannesson.“

Líklega enginn fyrr né síðar sætt nákvæmari rannsókn

Einar segir að hefði Ásthildur kynnt sér málin betur ætti hún að sjá að líklega hafi enginn Íslendingur fyrr eða síðar verið jafn ítarlega rannsakaður og Jón Ásgeir.

„Hefði Ásdís gert það hefði hún auðveldlega getað orðið sér úti um vitneskju um að líklega hefur ekki viðskiptaferill nokkurs Íslendings fyrr eða síðar sætt nákvæmari rannsókn yfirvalda, og það án þess nokkurn tímann fyndist snefill af glæpum eins og þeim sem þingmaðurinn telur sér sæmandi að fleipra um í greininni.“

Einar segir að það rétta sé að Jón Ásgeir hafi ekki átt ráðandi hlut í Glitni banka líkt og Ásthildur haldi fram. Hann hafi ekki setið í stjórn, var ekki starfsmaður og hafði engin afskipti af rekstrinum.

„Jón Ásgeir var með óskiljanlegum hætti ákærður vegna einhverra viðskipta bankans, sem áttu sér stað fyrir hrun, en sýknaður af þeim sakargiftum á öllum dómstigum. Jón Ásgeir hlaut engan dóm eftir íslenska efnahagshrunið. Að þingmaður skuli leyfa sér síðan að halda því fram að hann hafi stungið af úr landi með ránsfeng og skilið 15.000 fjölskyldur eftir í sárum, er ósmekklegt og fjarri öllum sanni.

Að lokum mætti kannski leyfa sér að setja fram þá kröfu eða þá von að umræddur þingmaður, sem og aðrir þingmenn, reyni að setja sig betur en hér var gert, inn í þau mál sem þeim hefur verið treyst til að fjalla um og byggja umræðuna á gögnum og staðreyndum – ekki innihaldlausum upphrópunum – þó ekki væri nema landsmanna allra vegna.“

Facebook

Twitter

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.