Páll Magnússon, fyrrum alþingismaður Sjálfstæðisflokksins og núverandi oddviti H-listans í Vestmannaeyjum, svarar Bjarna Benediktssyni, fjármálaráðherra, fullum hálsi í aðsendri grein á Vísi sem birtist fyrir stundu.

Eins og frægt er orðið birti Páll færslu á Facebook-síðu sinni þar sem hann fullyrti að kunningi hans hefði grætt 10 milljónir á örskotsstundu með því að kaupa í útboði Íslandsbanka á dögunum og selja hlutinn daginn eftir.

Í útvarpsþættinum Sprengisandi um helgina hjólaði Bjarni í Pál,  og ekki síður fjölmiðla, og sagði málflutning fyrrum alþingismannsins ekki standast skoðun.

„Páll Magnússon veður fram á ritvöllinn og segist hafa heyrt í manni sem skráði sig fyrir bréfum og seldi þau daginn eftir. Hvernig stendur á því að blaðamenn flytja svona vitleysu umbúðalaust og fleyta þessu áfram í umræðuna þegar allir vita að í fyrsta lagi var uppgjörsdagur á mánudegi og útboðið fór fram á þriðjudegi? Það gat enginn selt daginn eftir,“ sagði Bjarni í þættinum.

Sendir pillu á Bjarna

Í greininni svarar Páll Bjarna og segja má að hann skóli ráðherrann til í viðskiptagjörningum.

„Þessi fullyrðing ráðherrans er röng. Og kemur nokkuð á óvart að maður sem sjálfur hefur víðtæka reynslu af allskonar viðskiptavafningum frá því fyrir hrun skuli halda þessu fram. Það var hægt að selja þessi bréf strax daginn eftir. Í fyrsta lagi, segja mér fróðari menn, var hægt að selja þau í gegnum framvirka samninga af ýmsu tagi; í öðru lagi var hægt að selja þau til þriðja aðila með þeim einföldu skilmálum að uppgjör og afhending færi fram eftir sex daga – að loknu uppgjöri seljandans við Bankasýsluna. Þriðja leiðin var síðan einföldust og fljótlegust, hafi kaupandinn átt fyrir jafnmörg eða fleiri bréf í Íslandsbanka: Kostaboðinu tekið – milljón bréf keypt með afslætti á genginu 117 – og jafnmörg bréf úr gamla stabbanum seld þegar þau voru komin upp í 127 í Kauphöllinni daginn eftir. Vissulega ekki ‘’sömu’’ bréfin og hann fékkst beinlínis í hendur en ‘’snúningurinn’’ sá sami og sömu 10 milljónirnar komnar í hús. Eignarhlutur viðkomandi í Íslandsbanka sá sami fyrir og eftir – og ekkert hafði gerst annað en að hann græddi þessar 10 milljónir á meðan hann svaf,“ skrifar Páll hvass.

Hann segist vera sammála þeim sem segja að fjárhagslega hafi bankasalan gengið vel en klúðrið við framkvæmdina hafi skemmt allt. „Það sem tapaðist er hins vegar miklu verðmætara en nokkrir milljarðar til eða frá,“ skrifar Páll.

Segir sögu Páls breytast ört

Bjarni Benediktsson, fjármálaráðherra, svaraði síðar í dag fyrir sig og sagði sögu Páls taka örum breytingum.