„Vá hvað ég er pirruð og svekkt,“ er yfirskrift pistils sem Bryndís Haraldsdóttir, þingmaður Sjálfstæðisflokksins, skrifar en pistillinn sem um ræðir birtist á Vísi í dag.

Pistillinn fjallar um söluna á Íslandsbanka en hún hefur mikið verið gagnrýnd síðan hún fór fram, sérstaklega núna eftir að listinn um kaupendur var birtur. Á listanum mátti til dæmis finna félag í eigu Benedikts Sveinssonar, föður Bjarna Benediktssonar fjármálaráðherrra. Þá voru nokkrir eigendur og starfsmenn umsjónaraðila útboðsins á meðal kaupenda

Bryndís segist vera einlægur talsmaður þess að Íslandsbanki sé seldur en svo virðist vera sem hún sé ekki ánægð með það hvernig fór í þessu útboði. „Nú var lagt til að fara leið tilboðsfyrirkomulags sem felur í sér útboð á hlutum í þegar skráðu félagi til hæfra fjárfesta, án útgáfu skráningarlýsingar. Verð að viðurkenna að ég hafði ekki þekkingu á þessu fyrirkomulagi, en greinagerðin og heimsókn frá Bankasýslunni og öðrum gestum fékk mig til að trúa því að þetta væri gott fyrirkomulag,“ segir hún.

„Ég stóð í þeirri meiningu að leiðin væri til þess fallin að fá stóra fjárfesta inn í hópin fjárfesta sem væru líklegir til að vera hlutahafar til lengri tíma. Þannig átti ég von á að þarna væri fyrst og fremst um að ræða lífeyrissjóði, með þeim kostum og göllum sem því fylgir svo og öðrum stærri fjárfestingarsjóðum og fjárfestingaraðilum.“

Bryndís segist ekki hafa haft hugmynd um að starfsmenn og stjórnendur bankans, eigendur og starfsmenn umsjónaraðila útboðsins yrðu á meðal kaupenda. „Og það fyrir nokkra tugi miljóna. Þaðan af síður gat ég ímyndað mér að faðir fjármálaráðherra yrði meðal kaupenda,“ segir hún.

„Listin yfir kaupendur er því svekkelsi. Ég er ánægð með ákvörðun fjármálaráðherra að birta listann þrátt fyrir ráðleggingar Bankasýslunnar um annað, auðvitað eigum við að vita hverjir fengu að kaupa í þessum áfanga.“

Bryndís vísar í eldri grein sem hún skrifaði um söluna á Íslandsbanka og segir svo að hún sé sannfærð um að það hafi verið rétt ákvörðun að selja bankann. „Ég tel að regluverkið í kringum bankakerfið okkar sé gott. Ég tel það hárrétta ákvörðun hjá fjármálaráðherra að óska eftir úttekt Ríkisendurskoðunar á söluferlinu,“ segir hún.

„Traust og trúverðugleiki er það sem skiptir mestu máli þegar kemur að sölu ríkiseigna. Ríkiseigur á aldrei að selja nema í gegnsæi, sanngjörnu og réttlátu ferli.“