Í hádeginu í dag vakti Alþýðusambandið athygli á nýjum tölum frá Hagstofunni en í þeim kemur meðal annars fram að stjórnvöld hafa á undanförnum árum gripið til ráðstafana sem hafa fært beinan húsnæðisstuðning til þeirra tekjuhæstu á Íslandi.
Kristrún Frostadóttir, þingmaður Samfylkingarinnar, gerði þessar nýju tölur að umræðuefni sínu í ræðustól Alþingis í dag. „Niðurstöðurnar eru sláandi,“ segir hún um þær í ræðunni.
„Ríkisstjórnin hefur markvisst fært fjármuni úr vaxtabótakerfinu yfir í úrræði sem gerir fólki kleift að nýta séreignarsparnað sinn skattfrjálst til að greiða inn á húsnæðislán. Þetta hljómar mjög saklaust en þetta er veruleg stefnubreyting í okkar velferðarsamfélagi því að langstærsti hluti þessa skattafsláttar, rúmlega 30 milljarðar kr. frá árinu 2015, nýtist tekjuhæstu 30% landsmanna. Helmingur af úrræðinu rennur til tekjuhæstu 10% í landinu.“
Kristrún vekur þá athygli á því að stjórnarliðar hafi oft haldið ræður á Alþingi sem fjalla um mikilvægi þess að forgangsraða fjármunum landsins. „Þvílík hræsni,“ segir hún svo.
„Vaxtabótum sem nýttust tekjulágu fólki og ungu fólki var skipt út fyrir 30 milljarða kr. skattafslátt til einstaklinga í efri hluta tekjustigans, 30 milljarðar sem aðallega fara til fólks yfir fertugu þrátt fyrir að húsnæðisvandinn sé meðal ungs fólks og tekjulágs fólks. Snilldin við þetta úrræði er að þetta eru 30 milljarðar sem ríkisstjórnin þarf ekki að bera ábyrgð á því að þetta eru framtíðarskatttekjur.“
Þá spyr hún á hverjum þetta 30 milljarða króna tekjutap muni bitna á í framtíðinni og svarar því svo sjálf. „Jú, unga fólkinu sem hæstvirtur fjármálaráðherra er alltaf að tala um að treysti á svokallað útgjaldaaðhald ríkissjóðs vegna framtíðarskulda, sama unga fólkinu og þurfti að skuldsetja sig margfalt fyrir fyrstu eign vegna markvissrar stefnu ríkisstjórnarinnar undanfarinn áratug, að beina fjármagni frá þeim sem virkilega þurfa í almenn úrræði á húsnæðismarkaði sem pumpa upp húsnæðisverð. Samfélag jafnra tækifæra er að renna okkur úr greipum vegna þessa stjórnarfars.“
