Jóhann Páll Jóhannsson, þingmaður Samfylkingarinnar, tók til máls á Alþingi í dag og gerði fasteignamarkaðinn að umræðuefni sínu. „Húsaskjól er mannréttindi og íbúðir eru til þess að búa í, ekki til þess að braska með,“ sagði Jóhann í pontunni og fór svo yfir hvernig markaðurinn hér á landi er orðinn.
„Á síðastliðnu ári hefur íbúðarverð á landinu öllu hækkað um 16,6 prósent og það gerðist á aðeins tveggja mánaða tímabili að meðalkaupverð íbúða á höfuðborgarsvæðinu hækkaði um heilar fimm milljónir. Það er ekkert eðlilegt við þetta. Þetta er gjörsamlega sturlaður fasteignamarkaður og ástandið er bein afleiðing af efnahagsstefnu stjórnvalda og þeirri óstjórn sem hefur ríkt í húsnæðismálum á landsvísu um margra ára hríð.“
Þá ræddi Jóhann um leigumarkaðinn en hann benti á að leiguverð er farið að hækka hratt á ný. „Á leigumarkaði hefur kannski ríkt ákveðið svikalogn frá því að heimsfaraldurinn skall á en nú eru blikur á lofti. Við erum aftur farin að sjá leiguverð hækka hraðar heldur en verðlag og það er hætt við því að sú þróun ágerist eftir því sem ferðamönnum fjölgar, íbúðir fara aftur í Airbnb leigu og hagkerfið tekur við sér.“
Jóhann sagði það auðvitað vera fyrirsjáanlegt að leigan hækki þar sem hún fylgir yfirleitt fasteignaverði til lengri tíma litið. „Einmitt þess vegna er það skammarlegt og ég ætla að leyfa mér að segja bara algjört reginhneyksli að ríkisstjórn Katrínar Jakobsdóttir hafi enn ekki staðið við loforð sem voru gefin við undirritun Lífskjarasamningsins 2019 um réttarbætur fyrir leigjendur og endurskoðun húsaleigulaga,“ sagði hann þá.
„Þessi loforð voru svikin á síðusta kjörtímabili, nú átti frumvarp um þetta að koma inn í þingið í lok janúar, það kom ekki. Það átti að koma þarna inn samkvæmt þingmálaskrá en það bólar enn ekkert á því.“
Að lokum talaði Jóhann um varnir fyrir leigjendur en hann segir þær varnir vera miklu veikari hér á landi heldur en í öðrum velferðarríkjum. „Á hverjum bitnar það? Jú, það bitnar á þeim tekjulægstu, innflytjendum, fólkinu sem stendur berskjaldað og varnarlaust frammi fyrir hækkun leiguverðs næstu mánuði og ár,“ sagði hann.
„Virðulegi forseti, til langs tíma skiptir mestu að byggja, byggja og byggja ódýrt leiguhúsnæði á félagslegum forsendum en við þurfum líka að setja afgerandi reglur um leiguþak, leigubremsu og reisa skorður við hækkun leiguverðs áður en það rýkur enn meira upp.“
