Lögmaðurinn Sandra Hlíf Ocares sækist eftir 3. sæti í prófkjöri Sjálfstæðisflokksins í Reykjavík. Hún telur að þjónustan við fólkið í borginni hafi mætt afgangi undanfarið og þarfir þess ekki verið í forgangi – þessu vill hún breyta.

Sandra er fædd árið 1980 og er með meistarapróf í lögfræði frá Háskólanum í Reykjavík og hefur hlotið lögmannsréttindi. Undanfarin þrjú ár hefur hún starfað sem verkefnisstjóri Byggingavettvangsins sem vann meðal annars að breytingum á nýju mannvirkjalögunum. Auk þess hefur hún starfað sem framkvæmdastjóri viðskiptaþróunar hjá Eik fasteignafélagi og sem yfirlögfræðingur leikjafyrirtækisins Plain Vanilla.

Hún situr í barnaverndarnefnd Reykjavíkur og í kærunefnd útlendingamála og hefur auk þess gegnt ýmsum stjórnar- og trúnaðarstörfum fyrir Sjálfstæðisflokkinn. Hún hefur einnig setið í stjórnum ýmissa fyrirtækja, í stjórn VÍS, sem varaformaður stjórnar ÍV sjóða og sem formaður tilnefninganefndar VÍS.

Í framboðstilkynningu segir Sandra að borgin hafi alla burði til að eflast næstu árin – sé haldið rétt á spilunum.

„Borgin líður nú fyrir óþarflega mikla yfirbyggingu og kerfishugsun. Þjónusta við fólkið í borginni hefur mætt afgangi og þarfir þess ekki verið i forgangi. Þessu vil ég breyta. Ég trúi því að með nýrri og lausnamiðaðri hugsun megi leysa vanda fjölskyldufólks, húsnæðisvandann og seinagang borgarkerfisins ásamt því að eyða ákvarðanafælni. Ég býð fram krafta mína og reynslu í það verkefni.“

Hún segir að yfirbyggingin í borginni hafi fengið að vaxa nær stjórnlaust síðustu ár og skera þurfi þar niður.

„Ótal tækifæri liggja í að einfalda regluverk og löngu tímabærum áherslum á tækni og rafræna stjórnsýslu. Þannig losna fjármunir sem nýta má í grunnþjónustuna sem fólkið treystir á að sé í lagi.“

Í tilkynningu segir enn fremur:

„Börnin í borginni eiga að búa við sömu tækifæri og njóta umhverfis þar sem þau blómstra á eigin forsendum. Ég legg áherslu á að foreldrar hafi val þegar kemur að þjónustu leik- og grunnskóla og að yngstu börnin eigi öruggt pláss á leikskóla.