Runólfur Pálsson, nýr forstjóri Landspítalans, sagði í viðtali við RÚV á dögunum að fólkið í landinu vilji fyrst og fremst öfluga heilbrigðisþjónustu. Þá sagði hann að það þurfi að skilgreina hlutverk spítalans og að ekki sé sjálfgefið að spítalinn sinni öllum þeim verkefnum sem hann sinnir núna.
Þorgerður Katrín Gunnarsdóttur, formaður Viðreisnar, fjallar um þessi orð Runólfs í pistli sínum sem birtist á Vísi í morgun. „Ég get fyllilega tekið undir þessi sjónarmið sem forstjórinn setti þarna fram. Enda höfum við í Viðreisn ítrekað lagt áherslu að þjónustan í heilbrigðiskerfinu sé í fyrirrúmi og hún tryggð,“ segir Þorgerður í upphafi pistilsins.
„Með öflugu hátæknisjúkrahúsi, heilbrigðisstofnunum á landsbyggðinni og neti sjálfstæðra heilbrigðisaðila. Það er því miður ekki staðan í dag. Biðlistar og biðlistar til að komast á biðlista er það sem bíður margra. Því verður áhugavert að sjá hvaða stefnu ríkisstjórnin tekur núna. Í átt að betri þjónustu – eða frekari ríkisvæðingu. Það er stóra spurningin.“
Þorgerður segir að á síðasta kjörtímabili hafi ríkisstjórnin kappkostað við að „ríkisvæða hvern einasta anga heilbrigðiskerfisins“. Hún nefnir nokkur dæmi um þetta máli sínu til stuðnings.
„Neitaði að gera samninga við sjálfstætt starfandi sérfræðilækna, sjúkraþjálfara, sálfræðinga, talmeinafræðinga. Neitaði að gera samninga við Sjúkratryggingar þannig að hægt væri að tryggja þjónustu við fólk sem þarf á liðskiptaaðgerðum að halda. Ríkisstjórninni fannst einhverra hluta vegna forsvaranlegt að greiða niður aðgerðir á einkaklíník í útlöndum fyrir þrefalt hærra verð en hér heima. Svo ég tali nú ekki um það dómadagsklúður sem flutningur ráðherra á leghálsskimunum frá Krabbameinsfélaginu. „Aðför að heilsu kvenna“ var það kallað. Og það réttilega. Hneykslanleg aðför.“
Hún segir allt þetta hafa verið pólitískar ákvarðanir ríkisstjórnarflokkana. „Ákvarðanir um að verða besta land í heimi í biðlistum í heilbrigðiskerfinu. Og nú reynir á nýjan heilbrigðisráðherra að koma með sína stefnu,“ segir hún.
Þorgerður er vægast sagt ekki hrifin af þessari stefnu sem hefur verið í gangi í heilbrigðismálum. „Í mínum huga er þetta ekkert annað en argasta della,“ segir hún.
„Viðreisn hefur ítrekað lagt fram frumvarp sem leiðréttir þessa skekkju varðandi liðskiptaðgerðirnar. Tillögur okkar um að veita Sjúkratryggingum Íslands aukna heimild til að semja við sjálfstætt starfandi heilbrigðisstarfsfólk voru allar felldar. Við mótmæltum einnig ríkisvæðingu ríkisstjórnarinnar harðlega á síðasta kjörtímabili.“
Að lokum útskýrir Þorgerður hvernig hún vill að málin verði leyst. „Við viljum að þjónustan sé sett í forgrunn. Ekki rekstrarformið. Við þurfum sterkan og öflugan Landspítala,“ segir hún.
Þá segir hún henni finnst að þurfi að gera. „Við þurfum einnig að tryggja jafnt aðgengi og gera samninga við sjálfstætt starfandi heilbrigðisþjónustu. Niðurgreiða sálfræðiþjónustu, liðskiptaaðgerðir og tryggja jafnt aðgengi. Lina þjáningar. Auka lífsgæði. Þannig að það fólk sem hér kýs að búa fái heilbrigðisþjónustu við hæfi. 0g þurfi ekki að þjást á biðlistum,“ segir hún.
„Annað kjörtímabil af því sama er því ekki í boði.“
