Þvert á það sem áður hefur verið haldið fram hófst meðhöndlun atkvæða í norðvesturkjördæmi á sunnudag áður en allir meðlimir kjörstjórnar voru mættir á staðinn, og áður en umboðsmenn listanna mættu. Þeim upplýsingum hefur verið komið til lögreglu. Þetta herma öruggar heimildir DV.
Kjörseðlar í öllum kjördæmum nema norðvesturkjördæmi voru innsiglaðir eftir fyrstu talningu. Hluti kjörstjórnar neitaði að undirrita fundargerð vegna talningarinnar.
Minnst hluti kjörstjórnar hefur þegar farið í skýrslutöku hjá lögreglu vegna framkvæmdar talningarinnar en Karl Gauti Hjaltason kærði hana til lögreglu. Karl Gauti féll úr jöfnunarsæti fyrir Miðflokkinn við endurtalninguna.
Þá hefur Magnús Norðdahl, oddviti Pírata í kjördæminu, sagst ætla að kæra framkvæmdina til kjörbréfanefndar Alþingis og fara fram á svokallaða uppkosningu sem felur í sér að kosið yrði að nýju í Norðvesturkjördæmi.
Eins og sjá má í meðfylgjandi töflu var töluvert misræmi milli talninga. Atkvæðaseðlum fjölgaði um tvo, Sjálfstæðisflokkur fékk tíu atkvæði til viðbótar en Viðreisn missti níu. Þá fækkaði auðum seðlum um tólf en ógildum fjölgaði um ellefu.
Í fundargerð vegna talningar í norðvesturkjördæmi segir:
Fundi var frestað kl. 07:35 og ákveðið að honum yrði framhaldið kl. 13:00.
Meðan á fundarfrestun stóð voru kjörgögn geymd í salnum þar sem talningin fór fram en hann var læstur og öryggismyndavélar eru við inngang hans.
Kl. 11:46 kom oddviti aftur á talningarstað en um það leyti hafði Kristín Edwald formaður landskjörstjórnar samband við oddvitann og skýrði frá því að lítill munur væri á atkvæðafjölda að baka jöfnunarsætum í Norðvestur- og Suðurkjördæmi. Var því beint til yfirkjörstjórnar hvort tilefni væri til nánari skoðunar vegna þessa.
Kl. 12:15 mætti Ingibjörg Inga Guðmundsdóttir á talningarstað.
Kl. 12:30 mætti Berglind Lilja Þorbergsdóttir starfsmaður yfirkjörstjórnar.
Kl. 13:00 mættu Guðrún Sighvatsdóttir, Bragi Axelsson og Katrín Pálsdóttir á talningarstað. Var fundi þá framhaldið.
Vegna ábendingar formanns landskjörstjórnar var ákveðið að fara yfir atkvæði greidd C lista Viðreisnar. Í fyrsta C atkvæðabunka sem oddviti tók upp reyndust vera átta atkvæði sem tilheyrðu D lista og eitt atkvæði sem tilheyrði B lista. Yfirkjörstjórn fór í framhaldi yfir öll atkvæði C lista þ.e. athugaði hvort öll önnur en fyrrgreind atkvæði D og B lista tilheyrðu ekki örugglega C lista sem voru í bunkum merktum C. Svo reyndist vera en þá lá fyrir að mannleg mistök höfðu átt sér stað við talningu atkvæða undir morgun og níu atkvæði höfðu ranglega lent í atkvæðabunka C lista sem tilheyrðu öðrum framboðslistum. Með hliðsjón af þessu taldi yfirkjörstjórn ekki annað fært en að endurtelja öll atkvæði sem talin höfðu verið og yfirfara annað sem kynni að hafa leitt til þess að fyrrgreind niðurstaða um fjölda atkvæða hvers framboðslista væri ekki rétt.
Samkvæmt heimildum DV var ekki eining meðal fulltrúa kjörstjórnar um þá ákvörðun að telja aftur. Þá gefi fundargerðin til kynna að meðhöndlun atkvæða hafi ekki hafist fyrr en allir fulltrúar kjörstjórnar voru mættir en það sé ekki rétt og neitaði hluti þeirra að undirrita hana. Í gerðarbók sést síðan að enginn skrifar undir nema Ingi Tryggvason. Athygli hefur verið vakin athygli á þeirri ótrúlegu tilviljun að heil 9 röng atkvæði hafi verið í fyrsta bunkanum sem formaður yfirkjörstjórnar tók til skoðunar.
DV hefur sent ritara landskjörstjórnar beiðni um afrit af minnisblaði vegna samtals Kristínar Edwalds, formanns landskjörstjórnar, við Inga Tryggvason á sunnudag þar sem því var beint til yfirkjörstjórnar hvort tilefni væri til að telja aftur.
Landskjörstjórn útdeilir á morgun kjörbréfum til nýkjörinna þingmanna, samkvæmt endurtalningunni en við hana fóru fimm jöfnunarþingmenn út og fimm nýir komu inn.
Eftir að kjörbréfum hefur verið úthlutað verður hægt að setja Alþingi sem mun sjálft taka til meðferðar fyrirhugaðar kærur vegna kosninganna. Kjörbréfanefnd, skipuð þingmönnum, sér um það.
Engin fordæmi eru fyrir þessari undarlegu stöðu. Raunar telur Mannréttindadómstóll Evrópu ótækt að þingmenn greiði sjálfir atkvæði um lögmæti eigin kjörs, eins og til stendur hér.
Sjáðu muninn milli talninga sem felldi Karl Gauta – Auðum seðlum fækkaði um tólf
