Sú ákvörðun Landsvirkjunar að skerða afhendingu raforku til stórnotenda á borð við fiskimjölsverksmiðjur mun kalla á aukna olíunotkun upp á um 20 milljónir lítra en það svarar til um 54.400 tonna af kolefnisígildum.

Þetta hefur Morgunblaðið eftir Gunnþóri Ingvasyni, forstjóra Síldarvinnslunnar. Haft er eftir honum að ákvörðun Landsvirkjunar um að skerða afhendinguna strax muni margfalda kolefnisspor sjávarútvegsins og hafa mikinn aukakostnað í för með sér fyrir loðnubræðslurnar.

„Bræðslurnar eru stærsti orkunotandi á landinu fyrir utan stóriðjuna. Áður notuðum við allt að 50 lítra af olíu á tonn í þessum verksmiðjum. Nú eru þær að nota 38-45 lítra á tonnið,“ er haft eftir honum.

Hann benti einnig á að allar ellefu loðnubræðslurnar á landinu muni vinna á fullum afköstum frá janúar og fram í mars en ein stærsta loðnuvertíð í manna minnum er í uppsiglingu.

Sigurgeir Brynjar Kristgeirsson, framkvæmdastjóri Vinnslustöðvarinnar, sagði að ákvörðun Landsvirkjunar sé stórfurðuleg því fiskimjölsverksmiðjurnar hafi fjárfest í rafvæðingu og hafi kostnaðurinn verið um og yfir 500 milljónir á hverja verksmiðju. „Svo er skrúfað fyrir rafmagnið þegar við þurfum á því að halda. Það þýðir að við munum ekki ná kvótanum og þjóðin verður af útflutningstekjum,“ sagði hann.