Vangaveltur hafa verið uppi um hvort Biden muni bjóða sig fram á nýjan leik. Hann hafði sjálfur sagt áður að hann reiknaði með að sækjast eftir endurkjöri ásamt Kamala Harris varaforseta.
Skoðanakannanir hafa að undanförnu sýnt að stuðningur Bandaríkjamanna við Biden hefur farið minnkandi og það hafði vakið upp vangaveltur meðal margra Demókrata um hvort það myndi hafa áhrif á áhuga Biden á að sækjast eftir endurkjöri.
„Hann ætlar að gera það. Hann stefnir á það,“ sagði Psaki við blaðamenn í gær um borð í Air Force One flugvél forsetans í gær.
Demókratar urðu fyrir áfalli fyrr í mánuðinum þegar frambjóðandi flokksins tapaði í ríkisstjórakosningunum í Virginíu og rétt mörðu sigur í New Jersey. Úrslitin gætu verið forsmekkurinn af því sem koma skal í þingkosningunum á næsta ári.
Þá hafa verið uppi vangaveltur um möguleika Kamala Harris á að sigra í forsetakosningunum ef Biden ákveður að bjóða sig ekki fram. Hún hefur þótt heldur litlaus varaforseti og lítið hefur að henni kveðið það sem af er kjörtímabili. Í nýrri skoðanakönnun USA Today og Suffolk Univeristy sögðust aðeins 28% aðspurðra styðja hana.
En Biden vann stóran pólitískan sigur í síðustu viku þegar hann skrifaði undir lög um nýjan innviðapakka upp á 1.000 milljarða dollara. Þessi pakki er eitt stærsta pólitíska verkefni hans og sögulega stórt. Peningarnir verða nýttir í uppbyggingu innviða um öll Bandaríkin, bæði viðhald og nýja innviði á borð við brýr, vegi og nettengingar.
