Fréttablaðið skýrir frá þessu. Fram kemur að Svandís Svavarsdóttir, heilbrigðisráðherra og þingmaður Vinstri grænna, sé beggja blands í afstöðu sinni til málsins. Segist blaðið hafa heimildir fyrir að Svandís hafi talað fyrir uppkosningu en aðspurð sagðist hún hafa talað fyrir báðum niðurstöðu en finnist of bratt að hrapa að niðurstöðu um staðfestingu kjörbréfanna.
Inga Sæland, formaður Flokks fólksins, hefur ekki farið leynt með að hún telji að byggja eigi á niðurstöðu síðari talningarinnar í kjördæminu.
Fréttablaðið kveðst hafa heimildir fyrir að fulltrúar Sjálfstæðisflokks og Framsóknarflokks í nefndinni séu sama sinnis. Ef einhugur verður í þessum þremur flokkum þegar atkvæði verða greidd á þingi þá er kominn meirihluti fyrir staðfestingu kjörbréfa allra þingmanna en þessir þrír flokkar hafa 35 þingmenn samtals.
Fréttablaðið segir líklegt að þingmenn Samfylkingarinnar, Pírata og Viðreisnar muni greiða atkvæði gegn því að kjörbréfin verði staðfest. En óvíst er hvort þingmenn Vinstri grænna muni fylgja Svandísi að málum.
Innan þingflokkanna er mismunandi hvort ein sameiginleg lína verði tekin í málinu eða hvort þingmenn muni kjósa eftir eigin sannfæringu.
