Þórdís Kolbrún Reykfjörð Gylfadóttir, ráðherra ferðamála, atvinnu- og nýsköpunarmála segir tímabært að „stíga skrefið“ til fulls og fella úr gildi takmarkanir vegna Covid-19 faraldursins.

Bættist Þórdís þar með í sístækkandi hóp ráðherra og þingmanna sem talað hafa fyrir afléttingum að undanförnu. Þannig vakti Hildur Björnsdóttir borgarfulltrúi athygli í vikunni fyrir nokkuð afdráttarlaus orð um afléttingar. „Atvinnurekendur um alla borg berjast í bökkum vegna heimatilbúinna skilyrða stjórnvalda, sem eiga sér ekki hliðstæðu í nágrannalöndum. Það er löngu tímabært að endurheimta takmarkalaust samfélag og eðlilegt líf,“ skrifaði Hildur meðal annars og lauk máli sínu afdráttarlaust: „Afléttingar strax.“

Þá bættust þær Áslaug Arna Sigurbjörnsdóttir dómsmálaráðherra og Diljá Mist Einarsdóttir nýkjörinn þingmaður við listann í vikunni.

Segir Dani ekki kippa sér upp við smittölur

Í aðsendri grein í helgarblaði Morgunblaðsins vekur Þórdís athygli á því að Ísland er nú eina Norðurlandið sem ekki hefur tekist að rífa sig út úr „krísuástandi faraldursins“ og koma Íslandi í eðlilegt horf.

Öll hin norrænu ríkin hafa afnumið innlendar sóttvarnaaðgerðir að nánast öllu leyti. Danir, sem voru fyrstir til þess að afnema allar takmarkanir, kippa sér ekki upp við sveiflur í daglegum smittölum, enda eru nú færri inniliggjandi þar en þegar aðgerðunum var aflétt í byrjun september.

Þá segir Þórdís stjórnvöldum vera falið flóknara verkefni en sóttvarnaryfirvöldum. Þau verða enda að líta til heildarhagsmuna samfélagsins og geta ekki takmarkað útsýni sitt við „smittölur einstakra sjúkdóma.“

Þórdís segir þá ekki koma til greina að Íslendingar þurfi að sætta sig við að álag á heilbrigðiskerfið, af ýmsum ástæðum, sé notað sem réttlæting fyrir áframhaldandi takmörkunum vegna faraldursins. Skrifar hún að lokum:

Þótt sóttvarnasjónarmið séu mikilvæg og bráðnauðsynlegt sé að efla viðnámsþrótt heilbrigðiskerfisins, þá er það skylda stjórnvalda á Íslandi að standa vörð um almenn lífsgæði, efnahagslíf og menningu. Til þess þurfum við að hafa hugrekki til þess að lifa með þeim áhættum sem óhjákvæmilegar eru í mannlegu samfélagi. Stjórnvöld þurftu í einhverjum skilningi að fá frelsi fólks að láni. Það kom hins vegar aldrei annað til greina en að skila því aftur til réttmætra handhafa, fólksins sjálfs.

Nánar má lesa um skoðun Þórdísar í helgarblaði Morgunblaðsins.

Þá voru bæði Brynjar Níelsson og Sigríður Á. Andersen mjög virk í gagnrýni á harðar takmarkanir vegna Covid-19, en þau hlutu ekki endurkjör í síðustu kosningum.