Grjótharður reiðilestur Vilhjálms Bjarnasonar, fyrrverandi þingmanns, Sjálftæðisflokksins, í grein í Morgunblaðinu í gær, hefur vakið gífurlega athygli.
Vilhjálmur, sem segist hættur afskiptum af stjórnmálum, segir Sjálfstæðisflokkinn hafa niðurlægt sig og svikið. Hann rekur þá sögu er hann var tvisvar færður niður á framboðslista flokksins eftir sigur í prófkjöri, til að rýma fyrir konum í flokknum.
Vilhjálmur fer meðal annars hörðum og vægast sagt óvirðulegum orðum um þingkonuna Bryndísi Haraldsdóttur í eftirfarandi hluta greinar sinnar:
„Runkið með listann skipti þessa menn ekki máli, þeir höfðu loforð um það. En þeir litu betur út í augum Landssambands sjálfstæðiskvenna. Þær konur fengu mikla upphefð.
Sú er hlaut upphefðina þakkaði aldrei fyrir sig, fyrir að halda frið. Þegar sá, er var niðurlægður, var fallinn af Alþingi í snemmbúnum kosningum hringdi hún og bullaði og lét eins og fífl.
Síðar flaðraði hún upp um mig þegar ég varð á vegi hennar, eins og hundstík, og sagði innihaldslaust bull: „Gott að sjá þig.““
Bryndís Haraldsdóttir birti í dag opna færslu á Facebook með myndaröð af sér í félagsskap hunda. Auðvelt er að lesa pillu til hins reiða Vilhjálms í svohljóðandi stuttri færslu Bryndísar:
„Ég er þakklát öllum þeim sem treysta mér til góðra verka. Að starfa á vettvangi stjórnmála í bráðum 20 ár hefur gefið mér einstakt tækifæri til að starfa með fjölda fólks, bæði flokkssystkinum en líka fólki úr öðrum flokkum. Ég er þakklát fyrir það samstarf og þá staðreynd að það hefur almennt gengið mjög vel. Ég mun hér eftir sem hingað til leggja mig fram í störfum mínum, trúa á sjálfan mig og vanda mig í samskiptum við annað fólk. Og já ég elska hunda“
