Karl Gauti Hjaltason hefur ákveðið að kæra framkvæmd talningarinnar í Norðausturkjördæmi í gær til lögreglu. Þetta staðfesti hann nú í morgun eftir að formaður yfirkjörstjórnar viðurkenndi að atkvæðin þar hafi ekki verið innsigluð á milli talningar sem leiddi í ljós smávægilegan mun á niðurstöðu, en þó nóg til að fella Karl úr jöfnunarsæti.
Uppfært: 11:50 Magnús Norðdahl, oddviti Pírata í Norðvesturkjördæmi hefur einnig sagst ætla að kæra framkvæmd kosninganna í Norðvesturkjördæmi og mun krefjast þess að kosið verði upp á nýtt í kjördæminu.
Þykir nú ljóst að að ekki hefur verið settur endapunktur við Alþingiskosningarnar sem fram fóru í gær.
Í gær ákvað yfirkjörstjórn í Norðvesturkjördæmi að eigin frumkvæði að telja atkvæðin úr öllu kjördæminu upp á nýtt. Sú talning leiddi í ljós minniháttar skekkju sem þó dugði til þess að riðla röðun jöfnunarmanna í kjördæminu sem svo hafði keðjuverkandi áhrif á röðun jöfnunarmanna um allt land.
Uppstokkunin var svona:
Miðflokksmaðurinn Bergþór Ólason kom inn í staðinn fyrir Guðmund Gunnarsson hjá Viðreisn í Norðvestur.
Í Reykjavík norður datt hin 21 árs gamli Pírati Lenya Rún Taha Karim út og Jóhann Páll Jóhannsson kom inn fyrir Samfylkinguna.
Í hinu Reykjavíkurkjördæminu kom Orri Páll Jóhannsson inn fyrir VG og Rósa Björk Brynjólfsdóttir í Samfylkingunni fór út.
Hólmfríður Árnadóttir í VG vék þá fyrir Viðreisnarmanninum Guðbrandi Einarssyni í Suðurkjördæmi.
Í Suðvesturkjördæmi datt þá að lokum Miðflokksmaðurinn Karl Gauti Hjaltason út en inn kom Gísli Rafn Ólafsson í Pírötum.
Engin breyting varð á röðun þingmanna í Norðausturkjördæmi.
Við þessa uppstokkun fækkaði konum á þingi úr 33 í 30, og missti kvenkynið þannig meirihluta sinn á þingi, þann fyrsta í Evrópu. Þó ekki fyrr en búið var að senda tilkynningar þess efnis um víða veröld og margir af heimsins fjölmiðlum búnir að birta fréttir um áfangann.
Þung orð hafa síðan fallið um framkvæmd talningarinnar í kjördæminu og á það meðal annars bent að kosningasvindl fari yfirleitt fram við talningu atkvæða, en ekki í atkvæðagreiðslunni. Þó skal það tekið fram að enginn hefur beinlínis ásakað yfirkjörstjórn í kjördæminu um neitt misjafnt.
Í gærkvöldi staðfesti Ingi Tryggvason, formaður yfirkjörstjórnar í Norðvesturkjördæmi að kjörgögn hafi ekki verið innsigluð að talningu lokinni, en vísaði í því sambandi á „hefð“ um að gera það ekki. Komið hefur fram að kjörgögnin voru skilin eftir í talningarherberginu á Hótel Borgarnesi.
Í samtali við DV segir Magnús Davíð Norðdahl að þetta kunni að rýra trúverðugleika kosninganna, en tók það þó sérstaklega fram að hann hafi aldrei haldið því fram að mistökin hafi verið gerð af illum hug, eða af ásetningi. „Þetta snýst um trúverðugleika kosninganna.“ Magnús hefur jafnframt haldið því fram að kjósa verði aftur í kjördæminu.
Landskjörstjórn hefur nú boðað fund í dag þar sem óskað verður eftir skýrslu um talningu atkvæða í kjördæminu. Á dagskrá þess fundar verður jafnframt ósk fjögurra flokka um að talið verði aftur í Suðurkjördæmi, en þar munar aðeins örfáum atkvæðum á samskonar uppstokkun á röðun uppbótarmanna sem, eins og í gær, gæti orsakað keðjuverkun þvert á kjördæmin í landinu.
Eins og við var að búast lagðist Twitter á hliðina við fréttir af atganginum í Norðvesturkjördæmi.
Ok er þá hefð að fara ekki eftir kosningalögum sem kveða á um fjölda þátta sem ekki var farið eftir? https://t.co/FJVYdUtCqi
— Karen Kjartansdottir (@karenkjartansd) September 27, 2021
Or not
— Dr. Silja Bára (@siljabara) September 26, 2021
Eruði ekki klár í þetta allt saman aftur í október!? #x21
— Fanney Birna (@fanneybj) September 26, 2021
Fólk sem talar um að það eigi ekki að gera mál úr þessu því þetta varði bara niðurröðun jöfnunarmanna – hvenær á þá að gera mál úr svona? Þessar reglur eru til staðar af ástæðu, einmitt til að tryggja traust almennings til þess að kosningar séu framkvæmdar með réttum hætti. pic.twitter.com/QIzuCAm4u9
— Kolbrún Birna (@kolla_swag666) September 26, 2021
Saga Íslands, kafli þrjúþúsundogtvö:
Nýliðinn: Og hérna, eigum við ekki innsigla kjörgögnin eða eitthvað? Stóð það ekki í reglunum?
Formaður yfirkjörstjórnar: Innsigla? Ha! Heldurður að það sé nú hjartveikin í kvennfólkinu þarna fyrir sunnan. Svona, allir heim í smá blund.— Dagur Hjartarson (@DagurHjartarson) September 26, 2021
IMO þá er óábyrgt af kjörnum fulltrúum og frambjóðendum að veifa einhverjum kosningasvindlskenningum. Þar til annað kemur í ljós ætla ég að skrifa orðróminn á strangheiðarleg, aulaleg, mannleg mistök.
Lýðræðið þarf ekki á því að halda að fólk fari að vantreysta því.
— Jóhann Óli Eiðsson (@jedissson) September 26, 2021
Ef þetta ökuskírteinismál var ekki nóg fyrir einhverja Skafta og Skapta, til að kæra kosningarnar; er kjörstjórnin í NV búin að innsigla það (ólíkt kjörgögnum sem oddviti P segir að hafa verið skilin eftir á hóteli í Borgarnesi*)
*Mótel Venus, alltaf.https://t.co/s9Zj4c7eeo
— Helgi Seljan (@helgiseljan) September 26, 2021
Jæja þetta voru góðir 9 tímar
— Lenya Rún (@Lenyarun) September 26, 2021
Fúsk? Hvað meinarðu? Þetta hefur alltaf verið svona.
— Stígur Helgason (@Stigurh) September 26, 2021
“Yes hello. Is this the New York Times? Hi this is Björn from Íslandsstofa. I am afraid its been a mistake. We didnt elect a new ‘womens parliament’…Yes Í know it was a minor mistake….But you know what? We have Bergthor Olason! Thats a headline for you right!?!”
— Helgi Seljan (@helgiseljan) September 26, 2021
Mér þykir afar ólíklegt að nokkuð misjafnt hafi átt sér stað til að hringla með jöfnunarsæti innan flokka og frábið mér að fólk sé sakað um annarlegar hvatir þótt betur mætti að verki standa. Að því sögðu ætti samt að kjósa aftur í NV að mínu mati: pic.twitter.com/kTAUu9lTff
— Andrea Sigurðardóttir (@andreasig) September 27, 2021
