Fréttablaðið skýrir frá þessu í dag. „Hið opinbera er að leggja línurnar fyrir almenna markaðinn í komandi kjaraviðræðum. Það er eina ályktunin sem ég dreg af stöðunni,“ er haft eftir Ragnari um tölur frá Hagstofunni sem sýna að laun opinberra starfsmanna hækkuðu rúmlega tvöfalt miðað við starfsmenn á almennum markaði frá 2020 til 2021.
Á milli maí 2020 til maí 2021 hækkuðu laun opinberra starfsmanna um 12,4%, 14,5% hjá sveitarfélögunum og um 5,8% á almennum vinnumarkaði. „Það er erfitt fyrir okkur í verkalýðshreyfingunni að gagnrýna aðrar stéttir. Mín nálgun er sú að þegar aðrar stéttir eru að fara fram úr okkur í kjörum þá leggur það svolítið línurnar fyrir okkur um hvað við ætlum að sækja í fyrir næstu kjarasamninga. Þar horfum við náttúrlega til kjaraþróunar embættismanna – meðal annars alþingismanna, sem hafa fengið veglegar hækkanir langt umfram það sem við sömdum um í okkar kjarasamningum,“ sagði Ragnar.
Hann sagði að hjá VR eigi enn eftir að gera faglega úttekt á gögnum Hagstofunnar en horft verði til allra atriða í næstu kröfugerð. „Ef þetta eru línurnar sem er verið að leggja fyrir almenna vinnumarkaðinn fyrir komandi kjaraviðræður, mögulega endurskoðun kjarasamninga, þá í sjálfu sér liggur alveg fyrir hver grunnurinn á okkar kaupkröfu verður í aðdraganda næstu samninga,“ sagði Ragnar sem sagðist telja að nægt svigrúm sé fyrir launahækkanir á almennum markaði. Fyrirtækjum gangi almennt vel og launakostnaður hafi lækkað hlutfallslega. „Við erum með tölulegar staðreyndir fyrir framan okkur sem sýna ákveðið svigrúm sem er að byggjast upp,“ sagði hann.
Halldóri Benjamín Þorbergsson, formaður Samtaka atvinnulífsins, sagðist ekki vera hrifinn af launaþróuninni hjá hinu opinbera. „Það er mikil óheillaþróun sem við sjáum í þessum tölum. Þetta er þó að vissu leyti fyrirséð. Auðvitað er það þannig að þegar við förum í krónutöluhækkanir þá verða hlutfallslega mestu hækkanirnar á lægstu taxtana, sem eru hjá sveitarfélögunum. Það er alveg ljóst að breytingar sem samið er um í kjarasamningum opinberra starfsmanna hafa í gegnum söguna birst sem kröfur á almenna markaðinum með tímatöf. Í næstu samningalotu má gera ráð fyrir því að þar sem opinberi geirinn hafi farið fram úr hinum almenna muni þær kröfur framkallast á samningaborðinu,“ sagði hann.
