Spurnig Sigmundar Davíðs Gunnlaugssonar, formanns Miðflokksins, hefur vakið mikla athygli, en hann lagði fram fyrirspurn á Alþingi fyrr í sumar þar sem hann spurði: „Hversu mörg eru kyn mannfólks að mati ráðuneytisins?“.

Katrín Jakobsdóttir, forsætisráðherra, svaraði honum í gær og benti á að samkvæmt lögum um kynrænt sjálfræði væri hægt að skrá sig sem karl, konu eða kynsegin/annað. Hún sagði: „Kynin samkvæmt lögum eru ekki lengur tvö, kona og karl, heldur opnar skilgreiningin á hugtakinu í lögum á þann möguleika að kyn séu fleiri.“

Sjá einnig: Katrín svarar kynjaspurningu Sigmundar

Í Staksteinum Morgunblaðsins í dag er fjallað um málið. Þar er gefið til kynna að Katrín hafi svipt hulu af miklum leyndardómum með svari sínu. Auk þess er því haldið fram að það hafi verið fyrrverand forseti Bandaríkjanna, Barack Obama, sem hafi séð til þess að kynin gætu verið fleiri en tvö. Þar segir:

„Í aðdraganda kosninga er hulu iðulega svipt af leyndardómum sem almenningur þekkti ekki til. Sigmundur Davíð spurði Katrínu Jakobsdóttur hversu mörg kynin væru orðin. Okkur minnti flest að þau hefðu verið tvö frá arilds tíð.

En svo mundum við að Obama forseti ákvað í sinni forsetatíð að hér eftir teldust kynin vera 14 í grunninn. Því hann úrskurðaði einnig að opinber salerni yrðu ekki lengur merkt mynd karls eða konu. Obama tilkynnti að tækist svo til að karl, staddur í almenningsrými, yrði þar og þá sannfærður um að hann væri kona þá gilti sú niðurstaða strax og stæði jafn lengi og þessi vitund rjátlaðist ekki af manninum.

Karl, sem þannig uppljómaðist í konu, t.d. á flugvelli, mætti ekki takmarkast af salerni merktu karli og það þótt hann sjálfur væri afrendur jötunn, þrælskeggjaður og bassi forhertur.“