Glúmur Baldvinsson, oddviti Frjálslynda lýðræðisflokksins, skrifaði fyrir stuttu smellinn palladóm um formenn stjórnmálaflokkanna sem bjóða fram til Alþingis. Fengu formennirnir, allir utan formanns Framsóknarflokksins, Sigurðar Inga Jóhannssonar, heldur nöturlegar sumsagnir hjá Glúmi, sem þó minntist ekki á formann eigin flokks, Guðmund Franklín Jónsson.

 DV gerði pistli Glúms skil. Sjá: Glúmur tætir í sig forystu íslensku stjórnmálaflokkanna

Um Ingu Sæland, formann Flokks fólksins, skrifaði Glúmur:

„Inga Sæland grenjaði sig síðast inná þing fyrir öryrkja og býr enn í öryrkjaíbúð á ofurlaunum. Og nú hefur hún fengið til liðs við sig Tomma og Kobba sem ekki beint eru öryrkjar þótt aldnir séu orðnir.“

Þarna skjátlaðist Glúmi því Inga Sæland býr í eigin íbúð. Hann gengst við mistökunum í nýrri Facebook-færslu og biðst innilega afsökunar:

„Um daginn skrifaði ég pistil um forystumenn flokkanna sem birtur var í DV. Þar bar ég Ingu Sæland þungum sökum sem ekki eiga við rök að styðjast. Ég byggði þann málflutning á villandi upplýsingum. Í því ljósi vil ég biðja Ingu Sæland einlægrar afsökunar og óska ég henni alls hins besta. Ég er að mörgu leyti líkur móður minni sem innrætti mér að koma vel fram við alla, háa sem lága. Og þegar mér bregst sú bogalist nístir samviskan mig.“

Inga bregst afar vel við afsökunarbeiðni Glúms og segist samþykkja hana af heilum hug:

„Kæri Glúmur, ég þakka þér þitt fallega hjarta. ekki margir sem myndu sjá að sér á eins einlægan hátt og þú gerir nú. Ég óska þér sömuleiðis alls hins besta. Afsökunarbeiðnin er samþykkt af heilum hug.“