Fréttablaðið skýrir frá þessu í dag. Haft er eftir Bárði H. Tryggvasyni, sölustjóra hjá fasteignasölunni Gimli, að óhætt sé að segja að sprenging hafi orðið í sölu sumarhúsa á þessu ári og því síðasta. Hann sagðist vera búinn að starfa við fasteignasölu áratugum saman og muni ekki eftir öðru eins.
Heimir Hafsteinn Eðvarðsson, fasteignasali hjá Fasteignalandi, tók í sama streng og sagði að nú væri seljendamarkaður, allt seljist á yfirverði.
Bárður sagði að þar sem raunvextir séu neikvæðir um þessar mundir líti fólk á sumarhúsakaup sem fjárfestingu sem skili ágætis ávöxtun.
Heimir Hafsteinn sagði að fjölmargt eldra fólk hafi hætt við að selja sumarhúsin sína eftir að heimsfaraldurinn skall á. „Þar af leiðandi hefur komið minna inn af eignum en við áttum von á. Það bara vantar bústaði,“ sagði hann.
Hvað varðar verðhækkanir sagði Bárður að þær gætu verið um 30% frá því á fyrri hluta síðasta árs. „Það þótti vel í lagt að kaupa hefðbundna stærð af bústað fyrir 40 milljónir í fyrra, en núna þykir það ódýrt,“ sagði hann.
