Hafnartorgið í miðbænum hefur verið nokkuð til umræðu síðan það reis fyrir ekki það mörgum árum síðan og eru skiptar skoðanir á hvernig þetta nútímalega svæði passar inn í borgarbraginn og hvort að staðsetningin sé ekki gífurlega óheppileg með tilliti til vinda.
Engu að síður virðist Reykjavíkurborg afar stolt af svæðinu. Í dag birti Reykjavíkurborg fyrir og eftir mynd af svæðinu á Facebook og gott betur en það. Færslunni deildi borginn einnig í hverfishópum borgarinnar, mörgum til nokkurrar furðu.
Reykvíkingar létu þó ekki á sér standa og hafa athugasemdirnar streymt inn sem gefa smjörþefinn af því hvert raunverulegt álit almennings er á Hafnartorgi.
„Glötuð tækifæri til að gera eitthvað fallegt og skemmtilegt – í sátt við byggðina,” skrifar fjölmiðlamaðurinn Egill Helgason í athugasemd. Í annari athugasemd tekur hann fram að hann hefði verið sáttari við gömlu bílastæðin.
„Reyndar er ég þeirrar skoðunar að bílastæðin hafi verið skárri en steypuhlunkarnir sem voru settir niður þarna. Í bílastæðunum voru þó fyrirheit um að það væri hægt að gera eitthvað fallegt og skemmtilegt.”
Andrés Jónsson, almannatengill, er þessu ósammála. „Stórfelldar framfarir. Höfnin verður bráðum aftur einkennismerki Reykjavíkur og Kvosin aðalsvæðið.“
Björn Teitsson almannatengill veltir fyrir sér hvað vaki fyrir borginni að auglýsa Hafnartorgið með þessum hætti einmitt núna. „Frekar lélegur lestur á salnum að monta sig af þessu akkúrat núna.”
Píratinn Snæbjörn Brynjarsson segir Hafnartorgið mun betra en það sem áður var. „Allt er skárra en að hafa bílastæði á þessum stað. En útfærslan hefði mátt vera betri út af vindinum sér í lagi.“
Dæmi um fleiri ummæli sem hafa fallið í athugasemdum við þessar auglýsingar borgarinnar eru:
„Kalt, gelt og sólarlaust“
„Kraðak og skipulagsslys eru orðin sem koma til mín“
„Hryllingur. Lengi gat vont versnað… en það er greinilega mögulegt“
„Eins og skrattinn úr sauðarleggnum“
„Þetta er svo mikið drasl! Minnir á hverfi í austur-Berlín 1970. Ég sé engan vera að hanga þarna. Grátt, kalt og vindasamt.“
„Sjónmengun“
Margir eru þó sáttir við breytinguna og segja Hafnartorgið flott og frábært. Neikvæðu athugsemdirnar eru þó mun fleiri. En það þarf þó ekki að segja alla söguna þar sem margir eru frekar tilbúnir að tjá neikvæðar skoðanir sínar fremur en þær jákvæðu.
*Tekið skal fram að skrifstofa DV er staðsett á Hafnartorgi og þar sat blaðamaður og skrifaði ofangreint. Það var frekar mikill vindur.
