„Markmiðið er ekki einungis að gera þessa einstaklinga marklausa, heldur er einnig reynt að lama sjálfstraust þeirra og jafnvel vekja hjá þeim ótta og kvíða. Furðuleg myndbönd sem beinst hafa gegn fréttamanninum Helga Seljan eru dæmi um þetta. Þar verður ekki annað séð en að um beinar ofsóknir sé að ræða. Þótt skæruliðadeildin hafi í störfum sínum haft að meginreglu að tilgangurinn helgi meðalið þá hefur hún ekki náð þeim árangri sem vonir hennar hafa eflaust staðið til. Helgi Seljan hefur aldrei notið meiri virðingar sem fréttamaður en einmitt nú,“ segir Kolbrún og víkur því næst að Kristjáni Þór Júlíussyni, sjávarútvegsráðherra.
„Sá einstaklingur sem verst hefur farið út úr þessum dómsdagslátum Samherjamanna er einn af þeirra eigin mönnum. Samherjaráðherrann Kristján Þór Júlíusson hrökklast nú úr stjórnmálum, gjörsamlega rúinn trausti, einfaldlega vegna þess að almenningur hefur sett samasemmerki milli hans og hins illa þokkaða fyrirtækis Samherja. Vissulega dapurlegur endir á stjórnmálaferli, en sennilega óhjákvæmilegur,“ segir hún.
Hún segir að svo virðist sem skæruliðadeildin hafi unnið af ákafa en virðist jafnframt hafa vikið frá sér öllum hugsunum um hvað sé siðlegt, rétt og sanngjarnt. Það segir Kolbrún ekki vera góða leið til að lifa lífinu og skipti þá engu þótt há laun bíði manns um hver mánaðamót. „Sumt er einfaldlega siðlaust og engin laun, hversu há sem þau eru, fá því breytt,“ segir hún.
