Markaður Fréttablaðsins skýrir frá þessu í dag og hefur eftir Eyþóri Björnssyni, framkvæmdastjóra Samtaka sveitarfélaga og atvinnuþróunar á Norðurlandi eystra, að viðræður um endurskipulagningu skulda séu í gangi. Ekki sé búið að útfæra endurskipulagninguna.
Ríkissjóður fer með 33% hlut í Vaðlaheiðargöngum en Greið leið ehf. fer með 66% hlut en félagið er í eigu allra sveitarfélaga á Norðurlandi eystra. Það er ríkissjóður sem er lánardrottinn Vaðlaheiðarganga.
Markaðurinn segir að unnið sé að breytingum á lánssamningum til að létta á skuldabyrðinni og einnig sé verið að skoða að ríkissjóður breyti hluta af lánunum í hlutafé.
Göngin opnuðu í árslok 2018. Tafir við framkvæmdirnar höfðu mikla kostnaðaraukningu í för með sér miðað við upphaflega áætlun. Þegar upp var staðið var kostnaðurinn 17 milljarðar og var hann fjármagnaður með láni frá ríkissjóði. 2019 greiddu Vaðlaheiðargöng 900 milljónir í vexti.
„Við erum með mjög óhagstæð vaxtakjör miðað við það sem þekkist í dag og þess vegna skiptir miklu máli að endurfjármagna lánin svo reksturinn geti staðið undir sér í framtíðinni,“ er haft eftir Valgeiri Bergmann, framkvæmdastjóra Vaðlaheiðarganga. Hann sagði jafnframt að rekstrartekjur séu mun hærri en rekstrargjöld. Fyrirtækið er aðeins með tvo starfsmenn en rekstrarkostnaður þess var um 165 milljónir 2019 en á síðasta ári tókst að lækka hann um 20%.
