„Á öllum tímum hefur það verið öflugt vopn í heimi mannanna að nýta ótta við utanaðkomandi hættu til að ná pólitískum yfirráðum yfir hinum óttaslegnu. Sagan segir til dæmis að almenningur í Þýskalandi á tímum Hitlers hafi verið svo hræddur að fólkið hafi nánast lagt blessun sína yfir illvirki hans við útrýmingu á milljónum gyðinga á árum síðari heimsstyrjaldar.“
Svona hefst pistill sem lögmaðurinn Jón Steinar Gunnlaugsson skrifar en pistillinn birtist í Morgunblaðinu í dag. Í pistlinum líkir Jón Steinar óttanum sem Hitler notaði í Þýskalandi á tímum nasismans við óttann við kórónuveiruna sem sóttvarnaryfirvöld nota hér á landi til að sannfæra fólk um að fylgja settum reglum.
„Íslenska dæmið sem nú skellur á okkur er auðvitað ekki jafnalvarlegt og þetta þýska dæmi. En það er af sömu tegund,“ segir Jón. „Við Íslendingar erum nefnilega að upplifa það að stjórnvöld leitast við að nýta ótta þjóðarinnar við veiruna miklu til að fá hana til fylgilags við ofbeldisfulla stýringu á háttsemi manna í því skyni að ná tökum á veirunni.“
Jón Steinar talar svo um „orðhák úr röðum vísindamanna“ en nokkuð ljóst er að Jón á þar við Kára Stefánsson, forstjóra Íslenskrar erfðagreiningar. „Hann hallmælir dómstólum fyrir að virða meginreglur laga og uppnefnir þá sem fallast ekki á ruglið í honum. Sigríður Andersen alþingismaður hitti naglann á höfuðið þegar hún lýsti þversögninni sem felst í því að moldríkur orðhákurinn, sem kominn er á elliár og vill reisa múrvegg á landamærum landsins, líkti öðrum mönnum við Trump úr vesturheimi fremur en sjálfum sér,“ segir Jón í pistlinum.
„Hvernig halda menn að múgsefjunin virkaði ef ausið væri yfir þjóðina stöðugum áróðri um skaðsemi sóttvarnaaðgerða? T.d. um aukna tíðni sjálfsvíga, þunglyndi, atvinnuleysi, ógreinda sjúkdóma, frestaðar skurðaðgerðir og heimilisofbeldi, en lítið væri talað um skaðsemi veirunnar. Ætli múgsefjunin gæti þá snúist við? Þó að nauðsynlegt sé að fást við veiruna ættum við að muna að önnur verðmæti eru í gildi í okkar landi sem við ættum ekki að fórna í hennar þágu. Þar á ég við lýðræðislegt skipulag, þar sem leitast er við að vernda frelsi og mannréttindi borgaranna. Látum ekki orðháka af ætt Trumps spilla þeim verðmætum.“
„Ósmekklegt og ófyrirleitið“
Ljóst er að ekki eru allir sáttir með skrif Jóns en einn af þeim sem andmælir pistli hans er Jóhann Þorvarðarson, fastur pistlahöfundur á Miðjunni. Jóhann lýsir skoðun sinni á pistli Jóns í pistli sem hann skrifar sjálfur og birtist einmitt á Miðjunni. „Jón Steinar Gunnlaugsson lögmaður ritar einstaklega óábyrga og ósmekklega grein í Mogga dagsins. Telur líkindi vera á milli múgsefjunar Hitlers og baráttu íslenskra sóttvarnaryfirvalda við veiruna. Báðir aðilar eiga víst að stunda þá iðju að notfæra sér ótta almennings til að ná fram tiltekinni afstöðu fólks. Þar fer það sérstaklega fyrir brjóst lögmannsins að skerða þurfi ferðafrelsi þeirra sem mögulega bera veiruna,“ segir Jóhann í pistlinum.
Hann segir lögmanninn ekki átta sig á því að hér sé ekki um neina hliðstæðu að ræða. „Líkingamál lögmannsins er aftur á móti ósmekklegt og ófyrirleitið. Hitler sallaði niður gyðinga og önnur þjóðarbrot í útrás Þjóðverja á meðan þeir sem vinna að sóttvörnum á Íslandi eru að huga að almannaheilsu og vernda líf,“ segir Jóhann.
Þá furðar Jóhann sig á því að Jón hjóli í Kára Stefánsson. „Jón Steinar beinir spjótum sínum sérstaklega að Kára Stefánssyni, sem svo sannarlega hefur verið betri en enginn í baráttunni við Covid-19 veiruna. Lögmaðurinn ætti í raun að bugta sig í hvert sinn sem hann heyrir vísindamanninn Kára tjá sig um sóttvarnarmál,“ segir Jóhann.
„Svo má Kári víst ekki hafa skoðanir á dómstólum, sem njóta sama og engrar virðingar hjá landanum. Kára má bara ekki verða fótaskortur á tungunni nema hann sé sagður múraður og ruglandi orðhákur. Já, Kári er víst líka kominn á elliár að sögn Jóns eins og að það takmarki eitthvað tjáningarfrelsið hans.“
