Flugfélagið Play hélt lokað hlutafjárútboð sem lauk nú fyrir helgi. Í útboðinu skráðu fjárfestar sig fyrir meira en 40 milljónum dala, eða rúmlega fimm milljarðar íslenskra króna. Eins hefur verið tilkynnt að Birgir Jónsson hafi verið ráðinn forstjóri félagsins.
Þetta kemur fram í frétt Fréttablaðsins. Þar segir að meðal fjárfesta séu lífeyrissjóðirnir Birta og Lífsverk en einnig eitt umsvifamesta fjárfestingafélag landsins, Stoðir.
Lengi hefur verið beðið eftir að flugfélagið tæki loks á flug, en COVID-faraldurinn setti þar strik í reikninginn og áform um að hefja flug síðasta sumar eða síðasta haust urðu að engu. Félagið mun hafa tryggt sér þrjár Airbus A321 leiguflugvélar til að hefja áætlunarflug á vinsæla áfangastaði Íslendinga í útlöndum.
Hins vegar er engin dagsetning komin á fyrsta flugið, og vefsíðan flyplay.com hefur ekki birt nýja frétt eða tilkynningu síaðn 28. maí 2020 í ensku útgáfunni og 11. júní 2020.
Birgir Jónsson, sem áður var forstjóri Íslandspósts, tekur við stöðu forstjóra flugfélagsins frá Arnari Má Magnússyni, sem er einn þeirra fjögurra sem stofnaði félagið á sínum tíma.
