Guðjón Smári Agnarsson viðskiptafræðingur kaus Sjálfstæðisflokkinn frá því hann var rúmlega tvítugur og alveg fram að bankahruni (með undantekningum), en hefur nú snúið baki við flokknum.
Í grein í Morgunblaðinu í dag lýsir Guðjón því hvers vegna hann telur sig ekki geta kosið Sjálfstæðisflokkinn lengur. Guðjón telur að Bjarni Benediktsson sé að breyta Sjálfstæðisflokknum í krataflokk og bæði hann og Guðlaugur Þór Þórðarson utanríkisráðherra vilji leynt að Ísland gangi í Evrópusambandið þó að þeir telji enn um sinn ekki ráðlegt að gefa þá afstöðu upp:
„Ég tek afstöðu til flokka einkum eftir því hvernig þeir vilja halda í sjálfstæði þjóðarinnar og hvaða afstöðu þeir hafa til atvinnurekstrar lítilla og meðalstórra fyrirtækja. Reyndar er það þannig að frá því að núverandi formaður tók við hef ég ekki getað kosið Sjálfstæðisflokkinn á landsvísu. Það er geymt en ekki gleymt að hann hélt því fram í Fréttablaðinu fyrir u.þ.b. 15 árum að hann væri þeirrar skoðunar að Ísland ætti að ganga í Evrópusambandið. Þó að margt gott megi segja um manninn og þó að hann hafi ýmislegt gott gert í fjármálaráðuneytinu þá er það afar ótrúverðugt að flokkur hafi formann sem hefur öndverðar skoðanir við grundvallarstefnu flokksins. Ég hef skynjað orð hans um sjálfstæðismál þannig að hann hafi ekki skipt um skoðun á málinu – bara að það henti ekki að ganga inn um þessar mundir. Sjálfstæðisflokkurinn verður að standa undir nafni, annars er ekki hægt að kjósa hann. Mér virðist að hann sé að breytast í krataflokk. Kannski heldur forysta flokksins að þeir nái inn krötunum sem gengu út og stofnuðu Viðreisn. Þá gleyma þeir fólkinu sem hefur kosið flokkinn vegna þess að hann hefur staðið vörð um sjálfstæði landsins.“
Guðjón les hina meintu ESB-ósk Bjarna og Guðlaugs ekki síst út úr þeirri ráðstöfun stjórnvalda í bóluefnaöflun að halda sig algjörlega við áætlun ESB:
„Ég hef reyndar haft það á tilfinningunni í mörg ár að forsætisráðherra og heilbrigðisráðherra séu líka þeirrar skoðunar að Íslendingar eigi að ganga í ESB – bara ekki strax. Aðgerðir ríkisstjórnarinnar við pöntun bóluefnis gegn Covid-19 styrkja þessar grunsemdir mínar, þar sem samþykkt var að ganga í eina sæng með ESB og ríkisstjórnin afsalaði þeim sjálfsagða rétti frjáls og fullvalda ríkis að geta keypt bóluefni eftir öðrum leiðum. Það var ekki við hæfi að Sjálfstæðisflokkurinn tæki þá afstöðu.“
Guðjón tekur líka að gengið hafi verið of hart fram í sóttvörnum undanfarið miðað við fjölda smita og með þeim aðgerðum sé rekstrargrundvelli lítilla og meðalstórra fyrirtækja ógnað. Rekstrarleg og hagfræðileg sjónarmið hafi orðið útundan. „Þó að veiran komi frá Kína þurfa aðgerðir Íslendinga gegn veirunni ekki að vera í kommúnískum anda,“ segir Guðjón.
