Sú ákvörðun Áslaugar Örnu Sigurbjörnsdóttur dómsmálaráðherra að gera samning við Jón Steinar Gunnlaugsson, lögmann og fyrrverandi hæstaréttardómara, um ráðgjöf varðandi endurbætur á réttarkerfinu, hefur vakið mjög harða gagnrýni. Jafnréttissamtök og einstaklingar mótmæltu ákvörðuninni í gær vegna umdeildra skoðana Jóns Steinars á kynferðisbrotamálum. Í viðtali við DV sagðist Jón Steinar vera umdeildur vegna skoðana sem honum séu gerðar upp.
DV hefur samning dómsmálaráðuneytisins við lögmannastofu Jóns, JSG-lögmenn, undir höndum. Þar segir að verkefnið sé enn í mótun, en það felist í „greiningu málsmeðferðartíma í refsivörslukerfinu, allt frá því rannsókn lögreglu hefst og að upphafi afplánunar, auk viðbragða af ýmsu tagi sem miða að því að stytta þennan tíma. Unnið er samhliða að ólíkum verkþáttum s.s. styttingu boðunarlista Fangelsismálastofnunar og greiningu á málsmeðferðartíma og einstökum lagabreytingum.“
Í fyrstu er samið um 100 klukkustundir og á Jón Steinar að skila þeirri vinnu í febrúar, mars og apríl 2021. Greiddar eru 17.000 krónur á klukkustund sem þýða þá 1,7 milljónir króna fyrir 100 klukkustundir. Við það bætist virðisaukaskattur.
Ekki er sagt til um framhald samstarfsins en orðalagið virðist fela í sér að þetta sé aðeins fyrsti áfangi og verkefnið gæti haldið áfram. Ekki verður í þessum áfanga greitt fyrir meira en 100 klukkustundir nema að skriflegs samþykkis ráðuneytisins sé aflað fyrirfram.
