Atkvæðagreiðsla meðal félagsmanna VR vegna kjörs til formanns og stjórnar þessa stærsta stéttarfélags landsins hófst í morgun og stendur hún yfir til hádegis á föstudag.
Inni á heimasíðu VR segir að allir fullgildir VR-félagar hafa atkvæðisrétt auk þeirra eldri félagsmanna sem greiddu félagsgjald á 67. aldursári og 50 af 60 síðustu mánuðum þar á undan.
Atkvæðagreiðslan er rafræn og fer hún fram á heimasíðu stéttarfélagsins, VR.is
Tveir eru í framboði til formanns, Ragnar Þór Ingólfsson, sitjandi formaður, og hún Helga Guðrún Jónasdóttir. Báðir frambjóðendur hafa undanfarna daga lagt allt í sölurnar við að koma atkvæðum sínum í rafræna kjörkassann.
Ellefu gefa kost á sér til stjórnarsetu, en nöfn frambjóðendanna ásamt nánari upplýsingum má sjá hér.
Á meðal stjórnarframbjóðenda eru Sigríður Hallgrímsdóttir, fyrrum aðstoðarmaður Illuga Gunnarssonar er hann var menntamálaráðherra. Sigríður, eða Sirrý eins og hún er gjarnan kölluð, var þá einnig dálkahöfundur í Fréttablaðinu um tíma.
Óhætt er að segja að vindar hafi blásið um Ragnar Þór undanfarið. Í febrúar birti Fréttablaðið frétt um að Ragnar hafi verið í hópi manna sem staðnir voru að verki við ólöglega netalagningu í bergvatnsá í Skaftafellssýslu. Ragnar þvertók fyrir það og hótaði Fréttablaðinu málssókn. Fréttablaðið bakkaði þó ekki með fréttina og birti síðar um daginn mynd af netinu sem hópur Ragnars átti að hafa lagt.
Ragnar sagði frétt Fréttablaðsins hluti af ófrægingarherferð gegn sér í tengslum við formannskjörið.
Ragnar bakaði sér einnig óvild ýmiss í aðdraganda hlutafjárútboðs Icelandair, en hann hafði fyrr á kjörtímabili sínu hvatt til þess stjórn Lífeyrissjóðs verslunarmanna tæki ekki þátt í útboðinu vegna framgöngu Icelandair í kjaraviðræðum við flugstéttirnar þrjár, Félag íslenskra atvinnuflugmanna, Flugvirkjafélagið og Flugfreyjufélag Íslands. Þótti Icelandair ganga einna harðast fram gegn flugfreyjum eftir að þær felldu samninginn sem stéttarfélagið hafði gert við Icelandair.
Ragnar hlaut fyrir vikið mikla gagnrýni á sig vegna afskipta sinna af fjárfestingarstefnu lífeyrissjóðsins og sögðu sumir hana ólögmæta.
Helga Guðrún býður sig, sem fyrr segir, nú fram gegn Ragnari. Helga er stjórnmálafræðingur að mennt og fyrrum varaþingmaður Sjálfstæðismanna, formaður Landssambands sjálfstæðiskvenna og upplýsingafulltrúi Fjarðabyggðar. Þá hefur hún einnig starfað sem samskiptastjóri Sambands íslenskra sveitarfélaga.
Helga hefur áður boðið sig fram til formanns VR en tapaði þá fyrir Stefáni Einari Stefánssyni, viðskiptafræðingi.
Helga hefur í kosningabaráttunni gagnrýnt Ragnar Þór fyrir of mikla afskiptasemi af pólitískum deilumálum úr formannsstóli og vísar þá meðal annars til áðurnefndra afskipta Ragnars af fjárfestingarstefnu Lífeyrissjóðs Verslunarmanna. Stuðningsmenn Ragnars hafa á móti bent á að ásakanir um of náin tengsl við stjórnmál komi úr hörðustu átt í ljósi sterkra tengsla Helgu við Sjálfstæðisflokkinn.
Búast má við að úrslit úr atkvæðagreiðslunni liggi fyrir strax síðdegis á föstudag.
