Dagur B. Eggertsson, borgarstjóri var gestur í Silfrinu á RÚV í dag þar sem hann fór yfir stöðu mála eftir að skotárás var gerð á bifreið hans síðustu viku. Dagur sagði ótækt að láta slíka árás verða til þess að hann hætti afskiptum af stjórnmálum þó vissulega séu takmörk fyrir því sem maður getur tekið.
„Þetta ber nú bara þannig að okkur að laugardaginn fyrir viku var ég að vinna fram eftir inni í ráðhúsi eins og stundum áður og Arna konan mín sækir mig því við vorum á leiðinni í matarboð innan fjölskyldunnar. Dóttir okkar eldri situr frammi í þannig ég fer inn um farþegahurðina og tek eftir hringlaga gati um miðja hurð sem að er ekki eðlilegt og vakti strax spurningar,“ sagð Dagur í morgun í samtali við Silfrið.
Dagur hafði samband við lögreglu sem kom strax á vettvang og tók bílinn til rannsóknar.
„Við fáum svo þær fréttir á sunnudaginn að það hafi fundist kúlur í bílnum og bílhurðinni. Í raun virðast götin hafa verið tvö þegar betur var að gáð en það var þetta gat sem vakti þessar spurninga hjá okkur“
Allar líkur eru taldar á að skotið hafi verið á bifreiðina á meðan hún stóð fyrir utan heimili hans í miðborginni, aðfara nótt föstudags eða laugardags.
Dagur segir að það hafi vissulega verið áfall að lenda í slíkri árás, en það hafi verið eftir að opinber umræða hófst sem þetta varð virkilega raunverulegt. Fjölskylda hans hafi tekið málinu af miklu æðruleysi.
„Hún er nú ansi ótrúleg þessi fjölskylda satt að segja og konan mín og krakkarnir hafa tekið þessu af ótrúlegu æðruleysi, en þessu fylgja auðvitað erfiðar tilfinningar og þetta svona eitthvað óöryggi og álag og maður stendur sjálfan sig, og við öll, stöndum okkur á að horfa aðeins öðruvísi út um gluggann á meðan þetta er enn , það er mikið óvissa í þessu ennþá.“
Lögregla hafi ákveðið að vera með eftirlit við heimili dags nú um helgina á meðan staðan er enn óljós. Þó hefur verið greint frá því að karlmaður er sem stendur í gæsluvarðhaldi í tengslum við rannsókn málsins.
Gerði heimilið að skotskífu
Dagur taldi ótímabært að draga einhverjar ályktanir af árásinni, svo sem hvort árásin tengist með einhverjum hætti áróðursmyndböndum frá samtökunum Björgum miðbænum. Hann tók því fram að staðhæfingar settar fram í því myndbandi ættu við engin rök að styðjast og megi að hluta rekja til sögusagna.
„Maður veit eiginlega ekki hvernig maður á að bregðast við svona. Þarna er nokkuð auðugur maður [Bolli Kristinsson] sem hefur lýst því yfir opinberlega að hann ætli að helga sig því að koma mér frá sem borgarstjóra.“
Í myndbandinu bregður fyrir heimili borgarstjóra og er farið yfir meintan kostnað við framkvæmdir á Óðinstorgi. Dagur bendir á að þær tölur sem þar eru settar fram séu fengnar með því að bæta við framkvæmdum við aðliggjandi götur þar sem teknar hafi verið í gegn um hundrað ára gamlar lagnir og talan svo tífölduð. Fullyrðingar um að hann hafi fengið bílastæði án útboðs eigi rætur að rekja til sögusagna sem enginn fótur sé fyrir, enda hafi hann keypt bílastæðin af nágrönnum sem hafi átt þau fyrir, eða með öðrum orðum eðlileg viðskipti sem hafi ekkert að gera með Reykjavíkurborg eða stöðu hans sem borgarstjóra.
Hann hafi strax eftir að myndbandið fór í birtingu bent á það að með því væri verið að gera heimili hans að skotskífu.
„Mér fannst þarna verið að fara inn á einhverjar alveg nýjar brautir í íslenskri pólitík, færa mörkin, og gera heimili mitt að skotskífu.“
En þarna búi einnig fleiri en Dagur. Dagur varð klökkur þegar hann vék tali að nágrönnum sínum.
Ótrúlega þakklátur
„Nágrannar okkar hafa streymt til okkar undanfarna daga með blóm og myndir og allt og ég er ótrúlega þakklátur fyrir nágrannana og má ekki til þess hugsa að neinn, hvorki úr þeirra hópi né aðrir, skaðist. En ég held að það vilji það í raun enginn.“
Eins hafi hann og fjölskylda hans fengið gífurlegan stuðning í kjölfar árásarinnar sem sé dýrmætt.
Dagur segir það umhugsunarvert að horfa til árásarinnar, sem og árásar á húsnæði stjórnmálaflokka í samhengi við það að undanfarið virðist línur í samskiptum og stjórnmálaumræðu hafa færst til, meiri harka sé komin í umræðuna og margir hafi haft samband við Dag í kjölfar árásarinnar, stjórnmálamenn, fjölmiðlamenn og fleiri og greint frá hótunum og ógnunum sem þeim hafi borist.
„Þess vegna finnst mér að það sé mikilvægt að fólk láti þetta sig varða og tali um þetta og við drögum einhvers konar línu í sandinn og ræðum hvernig samfélag við viljum vera og hvernig samskipti eiga að vera milli fólks“
Aðspurður hvort árásin hafi orðið til þess að hann hugsi um að hætta í stjórnmálum segir Dagur að ekki sé rétti tíminn til að taka slíka ákvörðun.
„Auðvitað vill maður alls ekki skapa það fordæmi að með því að ógna einhverjum og hóta þá hrekist maður út úr stjórnmálum“
Hins vegar séu mörk fyrir því sem maður þolir.
„Ég skal bara vera alveg opinn með það að það eru auðvitað takmörk fyrir því sem maður lætur yfir sitt nánast umhverfi ganga“
