Stjórn Samfylkingarinnar lýsir yfir þungum áhyggjum vegna skotárása á skrifstofur stjórnmálaflokka og heimili stjórnmálafólks. Þetta kemur fram í tilkynningu frá flokknum sem barst rétt í þessu, en mikið hefur verið fjallað um umrædd skotárása mál í fjölmiðlum. Greint hefur verið frá því skotið hafi verið að skotið hafi verið á skrifstofu Samfylkingarinnar og á bíl Dags B. Eggertssonar borgarstjóra, líklega þegar bifreiðinn var stödd á heimili hans og fjölskyldu hans.
Árásinni í garð hans er lýst sem þeirri alvarlegustu í garð stjórnmálamanns á Íslandi.
Þá kemur fram að á Íslandi hafi fólk vanist því að stjórnmálafólk geti gengið um án sérstakrar öryggisgæslu og að almenningur geti tekið þátt í starfi stjórnmálaflokka án þess að óttast afleiðingar. Því þurfi fólk að standa vörð um grunnstoðir lýðræðisins og megi ekki sætta okkur við árásir, hótanir og ógnir í garð stjórnmálafólks
Yfirlýsingin er eftirfarandi:
„Samfylkingin lýsir yfir þungum áhyggjum af skotárásum á skrifstofur stjórnmálaflokka og heimili stjórnmálafólks. Tilefnið eru ítrekaðar árásir á höfuðstöðvar stjórnmálaflokka með skotvopnum, nú síðast með fjölda skota á skrifstofu Samfylkingarinnar og alvarleg árás í garð Dags B. Eggertssonar borgarstjóra og fjölskyldu hans. Engin dæmi eru um jafn alvarlega árás í garð stjórnmálamanns á Íslandi. Lýðræði og frjáls skoðanaskipti eru mikil verðmæti hverju samfélagi. Við hér á Íslandi höfum vanist því að stjórnmálafólk geti gengið um án sérstakrar öryggisgæslu og að almenningur geti tekið þátt í starfi stjórnmálaflokka án þess að óttast afleiðingar. Sama hvaða stjórnmálaflokk við kjósum, þá þurfum við að vernda grunnstoðir lýðræðisins og megum ekki sætta okkur við árásir, hótanir og ógnir í garð fólks í stjórnmálum eða vegna stjórnmálaskoðana þess.“
Þá hefur stjórn Varðar – fulltrúaráðs sjálfstæðisfélaganna sent frá sér ályktun varðandi maálið, en hún er eftirfarandi:
„Stjórn Varðar – fulltrúaráðs sjálfstæðisfélaganna í Reykjavík fordæmir skotárásir gegn stjórnmálaflokkum, starfsfólki þeirra og kjörnum fulltrúum, sem greint hefur verið frá í fjölmiðlum síðustu daga.
Fréttir sem fluttar voru fyrir helgi af skotárásum á starfstöðvar stjórnmálaflokka og fréttir dagsins í dag af skotárás á bifreið borgarstjóra Reykjavíkur vekja óhug. Árásir af þessum toga eru aðför gegn lýðræðinu sjálfu, gegn rétti fólks til að mynda og tjá sér skoðanir á opinberum vettvangi. Slíkar árásir mega ekki líðast í opnu og frjálsu samfélagi.
Það er von stjórnar Varðar að lögreglan hafi fljótt og örugglega hendur í hári þeirra sem hafa unnið þessi voðaverk. Hugur stjórnarinnar liggur hjá borgarstjóra og starfsmönnum þeirra stjórnmálaflokka sem orðið hafa fyrir þessum árásum, vonandi munu hvorki þeir né nokkrir aðrir þurfa að upplifa slík voðaverk framar hér á landi.“
