Markaður Fréttablaðsins skýrir frá þessu í dag. Leitað hefur verið til stórra einkafjárfesta og fjárfestingafélaga um að taka að sér leiðandi hlutverk í útboðinu en það hafði ekki borði árangur síðdegis í gær.
Í umfjöllun Markaðarins kemur fram að fjórir stærstu lífeyrissjóðir landsins, Lífeyrissjóður verslunarmanna, LSR, Gildi og Birta haldi spilunum þétt að sér og hafi ekki gefið upp hvort, og þá fyrir hversu mikið, þeir munu fjárfesta í útboðinu. Stjórnir sjóðanna funda síðar í dag og snemma á morgun þar sem endanleg ákvörðun um þátttöku verður tekin. Sjóðirnir eiga samtals eignir upp á rúmlega 3.000 milljarða króna.
Markaðurinn kveðst hafa heimildir fyrir að mesta óvissan ríki um afstöðu Lífeyrissjóðs verslunarmanna og Gildis. Stjórn Lífeyrissjóðs verslunarmanna fundar í dag og segir Markaðurinn að í henni sé töluverð gjá á milli fulltrúa atvinnurekenda annars vegar og fulltrúa VR um hvort sjóðurinn eigi að taka þátt í útboðinu. Sjóðurinn á 11,8% hlut í félaginu í dag og er næststærsti hluthafinn.
Ef tveir af stærstu lífeyrissjóðum landsins verða ekki með í útboðinu gæti það sett verulegt strik í reikninginn hvað varðar þátttöku annarra sjóða að sögn Markaðarins.
