Katrín neitaði því í samtali við Morgunblaðið að ferðaþjónustan væri látin mæta afgangi.
„Það eru engar afgangsstærðir í íslensku efnahagslífi, en þetta er flókið mat á flóknum aðstæðum. Staðan er önnur nú en í vor, þegar við vonuðum að þetta væru skammtímaráðstafanir.“
Hefur blaðið eftir Katrínu sem sagði aðspurð um hvort fréttir erlendis frá um lækkandi dánartíðni af völdum veirunnar breyti einhverju að reglulegt endurmat muni eiga sér stað á næstu mánuðum á bæði baráttunni gegn veirunni og viðbrögð stjórnvalda við efnahagsafleiðingum hennar.
Í grein sinni segir Katrín að frá upphafi hafi stjórnvöld haft að leiðarljósi að forgangsraða heilbrigði þjóðarinnar og af þeim sökum hafi verið gripið til töluverða sóttvarnaráðstafana til að hefta útbreiðslu faraldursins. Einnig hafi verið haft að leiðarljósi að lágmarka samfélagsleg og efnahagsleg áhrif af völdum faraldursins til lengri og skemmri tíma til að sem minnst áhrif verði á lífsgæði almennings.
Hún rekur síðan fyrstu viðbrögð stjórnvalda við faraldrinum og þær breytingar sem gerðar hafa verið á viðbrögðunum á landamærunum frá upphafi og nefnir þar til dæmis að um miðjan júlí hafi verið ákveðið að Íslendingar og þeir sem búa hér á landi skyldu fara í tvær sýnatökur og viðhafa heimkomusmitgát á milli þeirra.
„En svo kom að því að grípa varð í handbremsuna þann 30. júlí og setja aftur á fjöldatakmarkanir og fjarlægðarmörk innanlands eftir að veiran tók að breiðast út um samfélagið á ný. Vonbrigðin voru mikil. Aðeins nánustu aðstandendur gátu sótt útfarir, brúðkaupum og afmælisveislum var frestað og aftur var óvissa í andrúmslofti enda ljóst að önnur bylgja faraldursins var hafin.“
Hún bendir á að faraldurinn hafi vaxið um allan heim síðustu vikur og hafi smitum á landamærunum fjölgað til samræmis við það. Allt bendi til að önnur bylgja hans hér á landi tengist smitum sem komust yfir landamærin þrátt fyrir varúðarráðstafanir. Því hafi þurft að vega og meta hver næstu skref væru.
„Niðurstaða ríkisstjórnarinnar, að fengnum tillögum okkar færustu vísindamanna, var að herða þyrfti aðgerðir á landamærum með því að taka þar upp tvöfalda skimun með 4 til 5 daga sóttkví á milli sem valkosti við 14 daga sóttkví. Þar var byggt á reynslunni af aðgerðunum frá 13. júlí, þær útvíkkaðar og hertar. Ákvörðunin byggist á þróun faraldursins hér heima og erlendis en líka á þeim leiðarljósum sem sett voru í upphafi, að verja líf og heilsu fólks og tryggja að samfélagið geti gengið áfram með sem eðlilegustum hætti.“
Segir Katrín og bætir við að stjórnvöld muni áfram vinna að mati á áhrifum faraldursins og sóttvarnaráðstafana á efnahagslífið. Þetta sé flókið mat og ólíkar atvinnugreinar verða fyrir mismunandi áhrifum og ljóst sé að harðar aðgerðir á landamærunum hafi aðallega neikvæð áhrif á ferðaþjónustuna. Hún fjallar síðan um hin efnahagslegu áhrif og nefnir nokkur Evrópuríki til samanburðar. Því næst víkur hún að skerðingu á borgaralegum réttindum og segir umræðuna um hana mikilvæga í lýðræðissamfélagi.
„Stefna íslenskra stjórnvalda hefur frá upphafi verið skýr; að verja líf og heilsu fólks og tryggja sem eðlilegastan gang alls samfélagsins. Allar aðgerðir okkar endurspegla þessi leiðarljós og miða að því að tryggja hag almennings á Íslandi sem allra best.“
Eru lokaorð hennar.
