Rósa Björk Brynjólfsdóttir, þingmaður VG, vill að ríkið komi Icelandair til bjargar ef aðstæður kalli á. Sá stuðningur þyrfti hinsvegar að vera háður skilyrðum. Þetta segir hún á Facebook í dag og gagnrýnir orð Óla Björns Kárasonar á RÚV í gær, sem vildi ekki að ríkið tæki þátt í rekstri flugfélags, en að ríkið gæti þó veitt því lán:
„Seint munum við Óli Björn vera sammála um afskipti ríkisins af efnahagsmálum og kemur það því engum á óvart að ég ósammála yfirlýsingum hans um að hann sé á móti því að ríkið taki þátt í rekstri Icelandair við þessar aðstæður,“
segir Rósa Björk.
Hún segir leiðina sem Óli vill fara vera eiginlegan ríkisstyrk án skilyrða:
„Reyndar er hann mjög óskýr í sínum orðum og vill ekki að ríkið taki þátt í rekstri félagsins en að það sé í lagi að ríkið styðji við það með lánum með þeim skilyrðum að aðrir hluthafar láni fyrirtækinu líka og að ríkið eigi að greiða laun starfsmanna í uppsagnarfresti. Þessar tillögur eru í raun ríkisstyrkur en án allra skilyrða !! Nema auðvitað til að tryggja hag hinna hluthafanna í fyrirtækinu…sem eiga skv. Óla Birni að lána EF rikið lánar. Á svona tímum er ekkert pláss fyrir neina feimni eða frjálshyggju í dulargervi þegar kemur að ríkisafskiptum af stórum og þjóðhagslega mikilvægum fyrirtækjum á borð við Icelandair.“
Rósa vísar í að önnur ríki hafi komið flugfélögum til aðstoðar á liðnum dögum, eins og Air France í Frakklandi og KLM í Hollandi. En ef hlaupa eigi undir bagga með Icelandair, þurfi það að vera háð grænum skilyrðum:
„Það er ljóst að Icelandair er þjóðhagslega mikilvægt fyrirtæki fyrir Ísland en líka mikilvægt þjóðaröryggislega vegna landfræðilegrar legu okkar og smæðar. Störf hlaupa á þúsundum og bein afleidd störf má telja í hundruðum. Það er því hagur ríkisins að leggja til stuðning EF þarf. En það er gríðarlega mikilvægt að ef svoleiðis ákvarðanir verði teknar, séu þær gerðar með hag umhverfisins í huga og línurnar verði skýrar um ábyrga, siðferðislega starfshætti til hagsbóta fyrir launafólkið og starfsfólk en ekki sé eingöngu hugsað um hluthafana. EF ríkið ætlar að aðstoða þetta fyrirtæki við að halda velli, skulum við gera það vel. Gera það með skýrum, grænum skilyrðum og skilyrðum um að afnema hvers kyns bónusa, arðgreiðslur og hálaunastefnu stjórnenda. Ef ríkisstjórnir annarra ríkja geta þetta, getum við það.“
