Haukur Arnþórsson, stjórnmálafærðingur, skrifar inn í hóp sósíalista á Facebook í dag um þá kröfu Katrínar Jakobsdóttur forsætisráðherra, að útgerðirnar dragi til baka milljarða kröfur sínar á ríkissjóð vegna makrílúthlutunar.
Katrín sagði á Alþingi í gær að hún hefði reiðst þegar hún hefði komist að því að sjö fyrirtæki í sjávarútvegi hefðu gert kröfu á ríkið upp á 10.2 milljarða, auk vaxta, vegna meints fjártjóns vegna makrílkvóta sem fyrirtækin fengu ekki á árunum 2011-2018:
„Ég vil segja það að hér að ég hef verið gríðarlega ánægð með þá samstöðu sem maður hefur skynjað í samfélaginu í því að takast á við veiruna. Bæði fyrirtæki og fólk hafa þar sýnt mikla ábyrgð. Flokkar á Alþingi hafa sýnt mikla ábyrgð. Þetta er dýrmætt. En þá verður maður líka reiður þegar fyrirtæki í sjávarútvegi gera kröfu á ríkið upp á ríflega tíu milljarða vegna makrílúthlutunar,“
sagði Katrín.
„Hér er forsætisráðherra að beina skömminni í ranga átt til að hlífa sér og Vg. Staðreyndin er sú að alþingismenn gengu frá lögum um stjórn fiskveiða. Þau eru algerlega siðlaus. Skömmin er alþingismannanna sem settu þau lög og hafa látið þau viðgangast. Hér er m.a. átt við Vg,“
segir Haukur.
Sósíalistar hafa sögulega séð ekki beinlínis verið fullir samúðar í garð útgerðarfyrirtækja hér á landi og tekur Haukur fram að hann sé ekki að verja siðferði þeirra:
„Enda þótt siðferði stórútgerðarinnar verði ekki varið hér – þá er ekki óeðlilegt að íslensk fyrirtæki sæki sér þann rétt sem þau eiga lögum samkvæmt – ef þau eiga hann raunverulega. Alþingismenn ættu að vera ábyrgir fyrir tjóninu, þeir eiga að setja réttlát lög – en þeir geta ekki sagt aðilum í samfélaginu að afsala sér lagalegum rétti.“